Zatrymany ŭ krasaviku siłavikami biznesmien Erniest Alaksiejeŭ, atrymaŭšy apłatu za pastaŭlenuju techniku MAZ u Turkmienistan, vyvieŭ na rachunki afilavanych struktur nie mienš za 2 miljony dalaraŭ, zajaviŭ hienieralny prakuror Biełarusi Alaksandr Kaniuk na mižnarodnaj kanfierencyi «Supraćdziejańnie iłžepradprymalnictvu i niezakonnaj pradprymalnickaj dziejnaści» ŭ piatnicu ŭ Minsku, paviedamlaje Tut.by.
U ciapierašni čas Alaksiejeŭ zaklučany pad vartu. Nakładzieny aryšt na jaho majomaść. «Ale navat taho, što my kanfiskoŭvajem — kafe, katedžy, mašyny, ŭčastki — nie chopić, kab jon pahasiŭ škodu», — skazaŭ hienprakuror.
Kaniuk kanstatavaŭ, što ŭ ciapierašni čas hałoŭnaja prablema dla siłavikoŭ— heta pakryćcio škody ŭ poŭnym abjomie. «Raspaŭsiudžanaja praktyka, kali raspačynajecca kryminalnaja sprava ŭ dačynieńni da čałavieka, jaki ździejśniŭ ekanamičnaje złačynstva, i pačynajucca ruchi cieła pa realizacyi nieruchomaści, transpartnych srodkaŭ i hetak dalej. Usie hetyja ździełki pryznajucca niepraŭdzivymi. Pakryvać škodu pryjdziecca ŭ poŭnym abjomie», — kanstatavaŭ hienprakuror.
Sprava Alaksiejeva razhladajecca ŭ miežach kampanii pa pahašeńni prablemnaj debitorskaj zapazyčanaści bujnych dziaržkampanij. Jak raniej paviedamlałasia, da vyrašeńnia prablemy viartańnia zaviśli 500 młn dalaraŭ užo padklučyłasia Rada biaśpieki.
Kamientary