Zatrymany za karupcyju eks-kiraŭnik Leninskaha rajona Minska paprasiŭ Łukašenku ab pamiłavańni

Były kiraŭnik Leninskaha rajona Valeryj Kuleš, jakoha zatrymali letam 2016 hoda, napisaŭ na imia Łukašenki prašeńnie ab vyzvaleńni ad kryminalnaj adkaznaści. Pra heta TUT.BY raspavioŭ surazmoŭca ŭ dziaržstruktury i paćvierdziŭ staršynia Śledčaha kamiteta Ivan Naskievič.

U pačatku lipienia 2016 hoda siłaviki zatrymali byłoha kiraŭnika administracyi Leninskaha rajona Minska pa padazreńni ŭ pieravyšeńni słužbovych paŭnamoctvaŭ, što ŭvachodzić u śpis karupcyjnych złačynstvaŭ. Paźniej nijakaj infarmacyi ab jaho spravie nie było.

Surazmoŭca ź dziaržarhanizacyi skazaŭ, što apošnija naviny pra Kulaša čuŭ u vieraśni.

— Pakul nie vypuścili. Usie siadziać, čakajuć. Jon padaŭ prašeńnie ab pamiłavańni [na imia prezidenta], — raspavioŭ jon.

Staršynia Śledčaha kamiteta Ivan Naskievič paviedamiŭ, što kryminalnaja sprava ŭ dačynieńni da Kuleša pieradadziena prakuroru jašče ŭ mai 2017 hoda.

— Sprava tak i znachodzicca ŭ prakuratury, bo jon źviarnuŭsia z chadajnictvam ab pamiłavańni. Rašeńnia pakul niama. Heta niachutki praces, — dadaŭ kiraŭnik SK.

Padača Kulašom prašeńni ab vyzvaleńni ad kryminalnaj adkaznaści na imia kiraŭnika dziaržavy značyć, što eks-čynoŭnik pryznaŭ vinu i kampiensavaŭ škodu.

Pieryjad razhladu prašeńnia moža być roznym: i miesiac, i try, i paŭhoda. Kankretnaha terminu niama. Kali rašeńnie budzie stanoŭčym, to prakuror spynić rasśledavańnie kryminalnaj spravy. Kali admoŭnym — padaść jaho ŭ sud pry najaŭnaści ŭsich astatnich umoŭ.

U dačynieńni da Kuleša była zaviedziena kryminalnaja sprava sprava pa č. 3 art. 426 KK RB (Pieravyšeńnie słužbovych paŭnamoctvaŭ). Sankcyja hetaha artykuła praduhledžvaje pakarańnie ŭ vyhladzie pazbaŭleńnia voli na termin ad troch da dziesiaci hadoŭ z kanfiskacyjaj majomaści abo biez kanfiskacyi i z pazbaŭleńniem prava zajmać peŭnyja pasady abo zajmacca peŭnaj dziejnaściu.

Pa viersii pravaachoŭnikaŭ, čynoŭnik pieravysiŭ słužbovyja paŭnamoctvy z asabistaj i karyślivaj zacikaŭlenaści pry vykanańni funkcyjaŭ pa raźmierkavańni, raździaržaŭleńni i pryvatyzacyi dziaržmajomaści.

Kulašu taksama inkryminavali pradastaŭleńnie prefierencyj padkantrolnym arhanizacyjam na praviadzieńnie padradnych rabot na terytoryi Leninskaha rajona.

Akramia taho, pa viersii pravaachoŭnikaŭ, rabotniki kuryravanych im pradpryjemstvaŭ biaspłatna pracavali na budoŭli zaharadnaha doma čynoŭnika. Telekanał STB paviedamiŭ, što pieravyšeńnie słužbovych paŭnamoctvaŭ paciahnuła pryčynieńnie škody adnamu z pradpryjemstvaŭ Leninskaha rajona.

Kulaša pryznačyli kiraŭnikom Leninskaha rajona ŭ śniežni 2009 hoda. Da hetaha jon uznačalvaŭ «Minskzielenbud». Ciapier pasadu kiraŭnika Leninskaha rajona zajmaje Piotr Šostak.

• 0
• 0
• 0
• 0
• 0
• 0
• 0
• 0