Paśla narady ŭ Łukašenki ministr zamiežnych spraŭ Uładzimir Makiej raspavioŭ pra toje, jakich vizavych źmien varta čakać biełarusam.
Pa słovach ministra, užo sioleta mohuć być pryniaty novyja kroki pa libieralizacyi vizavaha režymu.
— Taja linija na libieralizacyju vizavaha režymu, jakaja ŭ svoj čas była ŭchvalena kiraŭnikom dziaržavy, u metach raźvićcia našaha turystyčnaha, dziełavoha patencyjału źjaŭlajecca pravilnaj. Było pryniata rašeńnie i dalej ruchacca akuratna ŭ hetym kirunku, stvarać bolš palehčanyja ŭmovy dla pajezdak zamiežnych hramadzian u Biełaruś, - paviedamiŭ Uładzimir Makiej.
Ciapier zamiežniki z 80 krain mohuć prylatać u Minsk na piać dzion bieź viz. A turysty, jakija jeduć u niekatoryja rajony Bresckaj i Hrodzienskaj abłaściej, mohuć zastavacca ŭ Biełarusi 10 dzion bieź vizy.
Taksama kiraŭnik MZS raźličvaje, što ŭ hetym hodzie Biełaruś i Rasija zmohuć damovicca ab uzajemnym pryznańni vizy.
- U bližejšy čas tyja prapanovy, jakija my atrymali ad našych rasijskich partnioraŭ, buduć praanalizavanyja, dapracavany, i my damo kaleham, na naš pohlad, dobry salidny dakumient, jaki pasłužyć asnovaj dla dalejšaj raboty pa spraščeńni vizavaha režymu ŭ cełym, - zajaviŭ Uładzimir Makiej.
A voś nakont damovy ź ES ab libieralizacyi vizavaha režymu terminy pakul nie ahučvajucca.
— Hetyja pahadnieńni praktyčna znachodziacca ŭ zaviaršalnaj stadyi, ale zastajecca jašče niekalki pałažeńniaŭ, jakija nam nieabchodna dadatkova abmierkavać z našymi jeŭrapiejskimi partniorami.
Tolki paśla padpisańnia pahadnieńniaŭ ab spraščeńni vizavaha režymu i ab readmisii biełarusy zmohuć raźličvać na patańnieńnie šenhienskaj vizy — 35 jeŭra zamiest 60.
Tym časam, paviedamiŭ Makiej, kraina viadzie pieramovy z Kitajem ab spraščeńni vizavaha režymu i «z šeraham krainaŭ» - ab uviadzieńni biaźvizavaha režymu.
Kamientary