Alaksandr Łukašenka pastaviŭ zadaču na praciahu 2018 hoda ŭrehulavać roznahałośsi z rasijskim bokam u pahraničnaj śfiery. Pra heta jon zajaviŭ siońnia na naradzie pa libieralizacyi vizavaha režymu, piša BiełTA.
Kiraŭnik dziaržavy adznačyŭ, što racyjanalnyja i całkam vytłumačalnyja dziejańni Biełarusi ŭ častcy libieralizacyi vizavaha režymu dla zamiežnikaŭ vyklikajuć naściarožanaść partniora pa Sajuznaj dziaržavie.
«Ź lutaha 2016 hoda biełaruska-rasijskaja miaža nabyła niehałosny status, jak jaje časta nazyvajuć u internecie i ŭsiudy, «samaj dziŭnaj miažy ŭ Jeŭropie». Z hetaha času rasijski bok biez aficyjnaha paviedamleńnia pačaŭ ažyćciaŭlać paŭnavartasny pašpartny kantrol u dačynieńni da ŭsich asob, jakija jeduć na aŭtamabilnym transparcie, a zatym — na avija- i čyhunačnym», — padkreśliŭ Alaksandr Łukašenka.
Kiraŭnik krainy źviarnuŭ uvahu, što ŭradu, Ministerstvu zamiežnych spraŭ i inšym zacikaŭlenym viedamstvam nieabchodna vyrašać hetaje pytańnie, nie śpichvajučy na kiraŭnika dziaržavy. «Heta nie narmalna, kali pamiž dźviuma braterskimi dziaržavami i narodami znoŭ adnaŭlajecca miaža, jakuju my z takoj ciažkaściu zdymali bolš za 20 hadoŭ tamu. Nie viedaju, kamu heta treba», — skazaŭ jon.
Rasijski bok zychodzić nibyta ź mierkavańniaŭ biaśpieki. «Ale ab jakoj biaśpiecy moža być havorka, kali ŭ nas sumiesnyja śpisy zamiežnikaŭ, jakim zabaronieny ŭjezd na terytoryju Sajuznaj dziaržavy. Nichto nie moža ŭjechać, chto znachodzicca ŭ hetych śpisach. Chto nie znachodzicca, maje prava ŭjechać, pakul nie trapić u hetyja śpisy.
Tamu ŭsialakija adhavorki i spasyłki na toje, što ŭ nas nibyta nie toje tut robicca, i tamu ŭvodzicca miaža, niapravilnyja», — zajaviŭ kiraŭnik dziaržavy.
Bolš za toje, źviarnuŭ uvahu Alaksandr Łukašenka, pamiž siłavymi viedamstvami Biełarusi i Rasii naładžana vielmi kanstruktyŭnaje i sistemnaje supracoŭnictva, jany pravodziać sotni surjoznych i efiektyŭnych sumiesnych apieracyj. «Ale treba razumieć i toje, što, kali Rasija ŭzdymaje hetaje pytańnie, značyć, peŭnyja aściarohi isnujuć. Treba z rasijanami vieści na hety kont dyjałoh. Ale zakryvacca adzin ad adnaho nielha, heta budzie drenny prykład.
Ni biełaruski narod, ni rasijanie heta nie padtrymajuć i nie aceniać», — pierakanany jon.
Kiraŭnik dziaržavy dadaŭ, što treba pradmietna abmierkavać, jakija roznahałośsi zachoŭvajucca z rasiejskim bokam, jakija miery nieabchodna raspačać, kab ich likvidavać. «Paralelna treba vyrašać i pytańni readmisii, bo nielehały jeduć da nas u asnoŭnym praz Rasiju — pra heta śviedčyć statystyka, — kanstatavaŭ Łukašenka. — Hetyja pytańni treba vyrašać kanstruktyŭna, za stałom pieramovaŭ. Na praciahu 2018 hoda ŭsie pytańni treba źniać. I žyć nam hodna, pakazvajučy prykład usim u śviecie, jak mohuć žyć družalubnyja narody i dziaržavy».
Ciapier čytajuć
Na Kipry źnik Uładzisłaŭ Baŭmhiertnier, były hiendyrektar «Urałkalija». Jaho zatrymlivali pa skandalnaj spravie ŭ Minsku, kali jon prylataŭ da Miaśnikoviča
Kamientary