Try byłyja prezidenty Ukrainy — Leanid Kraŭčuk, Leanid Kučma i Viktar Juščanka — padpisali sumiesny zvarot, u jakim padtrymali ideju stvareńnia va Ukrainie pamiesnaj aŭtakiefalnaj carkvy. Pra heta jany zajavili na sumiesnaj pres-kanfierencyi.
«My ličym, što pradastaŭleńnie aŭtakiefalii Kanstancinopalskaj maci — carkvoj syhraje važnuju rolu va ŭmacavańni niezaležnaści Ukrainy, duchoŭnaha i nacyjanalnaha adzinstva našaha naroda, raźvićci relihijnaj svabody va Ukrainie - budzie spryjać plonnamu mižkanfiesijnaha dyjałohu ŭ našaj krainie», — začytaŭ tekst zvarotu Leanid Kraŭčuk.
U dakumiencie taksama havorycca, što aŭtakiefalnaja pamiesnaja carkva stanie «niepieraadolnaj duchoŭnaj krepaściu ŭ baraćbie z rasijskaj ahresijaj suprać Ukrainy». Eks-prezidenty zaklikali da abjadnańnia hramadzian, «adkaznych palitykaŭ» i hramadskich dziejačaŭ dziela hetaj mety.
Na Ukrainie dziejničajuć try bujnyja carkvy — Ukrainskaja pravasłaŭnaja carkva (samakiravalnaja carkva z pravami šyrokaj aŭtanomii ŭ składzie Maskoŭskaha patryjarchatu), a taksama Ukrainskaja aŭtakiefalnaja pravasłaŭnaja carkva (UAPC) i Ukrainskaja pravasłaŭnaja carkva Kijeŭskaha patryjarchatu (UPC KP).
UAPC i UPC KP padpisali sumiesny zvarot na imia patryjarcha Kanstancinopalskaha, u jakim paprasili padtrymać prašeńnie ab aŭtakiefalii. Prezident Ukrainy Piotr Parašenka taksama nakiravaŭ jamu svajo prašeńnie ab padtrymcy aŭtakiefalii, jakoje taksama padtrymali deputaty Viarchoŭnaj rady.
Kamientary