Statkievič rastłumačyŭ, čamu nie dałučyŭsia da akcyj u Kurapatach: Ratavać treba žyvych
Ad 1 červienia hramadskija i palityčnyja aktyvisty pravodziać štodzionnyja akcyi kala ŭročyšča Kurapaty, dzie bližejšym časam maje być adkryty restaran «Pajedziem, pajadzim». Karystalniki interneta źviarnuli ŭvahu, što da akcyj nie dałučyŭsia lidar niezarehistravanaha Biełaruskaha nacyjanalnaha kanhresu Mikałaj Statkievič. Z čym heta źviazana?
«Kurapaty — simvał trahiedyi biełaruskaha naroda. Simvał stalinskich represij. Kolkaść represavanych u Biełarusi ad 600 tysiač da 1,5 miljona čałaviek. Viadoma, heta nie tolki zabityja.
U mianie jość ułasnyja Kurapaty pad Słuckam, dzie ŭ studzieni 1937 hoda byŭ rasstralany i zakapany moj dzied pa matčynaj linii Symon Harabiec. Ja pastaviŭ tam kryžy, ja tudy jezdžu», — skazaŭ Statkievič.
A što tyčyć ciapierašniaha supraćstajańnia? «Ja padtrymlivaju dziejańni aktyvistaŭ, jaki supraćstajać dziejańniami adkryć zabaŭlalny restaran la Kurapataŭ. Heta trahičnaje miesca i ludzi, jakija tam chočuć rabić hrošy na zabavach, pastupajuć nie maralna».
Mnohija źviarnuli ŭvahu na emacyjnaje vykazvańnie hienieralnaha sakratara arhkamiteta partyi «Narodnaja Hramada» Siarhieja Sparyša, jaki nazvaŭ baraćbu ŭ Kurapatach «prykołami hieta».
«Što tyčycca emacyjnaści spadara Sparyša, to ja jaje tłumaču absalutna nieprystojnymi pavodzinami ŚMI, kali pisali takoje kštałtu «Sparyš-Aparyš», kali lezuć u łožak da našych aktyvistak «Narodnaj Hramady»… Čałaviek emacyjna reahuje na abrazy. Siarhiej Siarhiejevič Sparyš — patryjot Biełarusi, mužny i hodny čałaviek.
25 Sakavika jon byŭ na płoščy Jakuba Kołasa, kali ŭ Centralnym RUUS stali vykručvać palcy dziaŭčatam, to jon uziaŭ udar na siabie. Jon skazaŭ milicyjantam takija słovy, što lažaŭ hadzinu ŭ kajdankach na choładzie i pa im chadzili nahami. Sparyš — šosty čałaviek u «Narodnaj hramadzie», paśla staršyni i čatyroch namieśnikaŭ, mnie niepryjemna, što suprać jaho viadziecca takaja kampanija. Ja nahadaju, što ŭ 80-ju hadavinu «Nočy rasstralanych paetaŭ» Siarhiej Sparyš byŭ la budynka KDB», — skazaŭ Statkievič.
Ci płanuje ŭsio ž palityk asabista padtrymać abaroncaŭ Kurapataŭ? «Pazicyja «Narodnaj Hramady» takaja, što najpierš treba iści da kataŭ, a nie da mahiłaŭ. Bo tam spadkajemcy kataŭ, jany nie pakajalisia, partrety kataŭ visiać u ich kabinietach. A tak heta sprava kožnaha — prychodzić ci nie prychodzić. U mianie jość svaje Kurapaty, ja jezdžu tudy.
Mahčyma, padydu padtrymaju. Ja jašče nie vyrašyŭ, ułada ž nibyta kaža, što nie adkryje ŭstanovu. Bahata inšych spravaŭ, ratavać treba žyvych. Našych kaleh pa BNK Fiadyniča i Komlika treba ratavać ad turmy».
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki26
Kamientary