Chare ržać!
Navahodniaje vinšavańnie lidera nacyi. (Lolika Uškina.)
Dziaržaŭnyja dziejačy jaŭna sastupajuć artystyzmu Pietrasiana i Edzi Miorfi, što akupujuć navahodni eter. Zatoje ŭ ich jość džokier: vinšavańni pačynajucca ŭ prajm-tajm, za dziesiać chvilin da boju kurantaŭ. Adnak čaściej materyjalizacyja na ekranach mužykoŭ u pafasnym ekstazie słužyć hramadztvu ŭ jakaści śvistka — čas adkarkoŭvać šampusik, padpalvać, ryzykujučy žyćciom, kitajskija petardy i vałačy na stoł aliŭje. Kali, naturalna, da hetaha času vy ŭžo nie askacinilisia. Nikoli nia bačyŭ, kab ŭ 23.50 niechta padarvaŭsia i zaroŭ: «Dy cicha vy, baby, dajcie pasłuchać pra jarkija dasiahnieńni ŭ duchoŭnaj sfery, kultury i sporcie!..»
Aproč taho, časam palityki praz svoj davier da fiłfakaŭcaŭ-śpičrajteraŭ vyhladajuć niejak štučna. «Bataniki» ŭhnojvajuć ich prahony mudrahielistymi litaraturnymi pryjomami. Słuchaješ — i prosta padmyvaje zajenčyć: «Nia vieru!» Paru hadoŭ nazad toj, chto łajecca matam z padnačalenymi, pačaŭ vinšavańnie mudraj alehoryjaj: «Čas — heta ptuška». Toj śpičrajter jašče b ukłaŭ jamu ŭ vusny łacinski afaryzm. Ujaŭlajecie — «Dobry viečar, darahija suajčyńniki, tempora mutantur, et nos mutamur in illis».
Nu i narešcie, takija śpičy pradkazalnyja, ich kancepty nie mianialisia z časoŭ Mikity Siarhiejeviča: aptymistyčnyja vyniki hodu, padziaki pipłu, pakiet pažadańniaŭ z vychadam na stereatypnaje «Z Novym hodam!» I z takoj chochmaj kankuravać ź Filem i Ałaj, jakija paabiacali 31 śniežnia adkryć sakret svajho razvodu?
Što ž rabić, kab vytrymać vyklik śvietu papsy? Samaje prykolnaje, što vyjście vielmi prostaje. Absalutna nia treba iści šlacham praduseraŭ, jakija namahajucca nadać adstojnym pieradačam novaje dychańnie. Naprykład, jany prapanavali b dla padniaćcia rejtynhu zaprasić u studyju pop-zorku. Nu kaniečnie: nichto b nie prajšoŭ mima anonsu «Vinšavańnie narodu ad prezydenta respubliki X i hrupy «Toples».
Nie, nia treba ničoha mianiać — ni tekst, ni vystupoŭcu, ni farmat.
Treba prosta padkarektavać teleprahramu — niachaj budzie nie «Navahodniaje vinšavańnie prezydenta RX narodu», a «Humarystyčnaje vinšavańnie prezydenta RX narodu». I ŭsio.
«U nas niama relihijnaj i nacyjanalnaj varožaści… I kožnamu adkryta daroha da svajho chramu», «U nas u krainie chto choča pracavać — pracuje. I zarablaje!», «Irža karupcyi nie raźjadaje naša hramadztva»… Heta cytaty z navahodniaha vystupu adnaho palityka. Chiba pry adekvatnym nastroi na ŭsprymańnie jany nie hučać viesialej, čym usie perły «Anšlahu»?
Nu ŭsio, chare ržać. Z Kaladami i Novym hodam!
Vynieśli prysud Palinie Zyl — błohiercy, jakaja stała nulavym pacyjentam spravy Hajuna, bo ŭ jaje znajšli tuju samuju spasyłku ad Matolki15
Kamientary