Mialeje Nioman, sudnachodstva prypyniena. Takoj zasuchi nie było 70 hadoŭ
Biez daždžoŭ rehijon žyvie ŭžo amal dva miesiacy. Bjuć tryvohu ahraryi — uradžaj pad pahrozaj. Składanaja abstanoŭka i ŭ lasach. Ciopłaja viasna i haračy červień — pa słovach sinoptykaŭ, takoha zasušlivaha nadvorja ŭ vobłaści ŭ hety čas nie było bolš za 70 hadoŭ, paviedamlaje ONT.
Stan raki hidrołahi prychodziać pravieryć dvojčy na dzień. I pakul vyniki nie ciešać. Uzrovień vady z kožnym dniom usio nižejšy: pačaŭ imkliva padać jašče ŭ traŭni. I da hetaha času situacyja zastajecca składanaj. Sudnachodstva na Niomanie prypyniena, prahułačny ciepłachod «Volha Sołamava» pryšvartavaŭsia da bieraha.
Daždžy kali i iduć, to tolki miescami, dy i tyja — karotkačasovyja. Ad zasuchi pakutuje ŭsia vobłaść. Krychu lepš situacyja na poŭnačy rehijonu — u Astraŭcy i Ašmianach. Tam jašče zachavałasia vilhać u hlebach. A voś na zachadzie — u Hrodnie i Hrodzienskim rajonie — daždžoŭ nie bačyli amal dva miesiacy. Ciopłaja viasna, suchi maj i haračy červień — takoha nadvorja, zapeŭnivajuć sinoptyki, nie było z časoŭ zakančeńnia Vialikaj Ajčynnaj vajny.
Uzdoŭž bierahoŭ staić niepryjemny pach z-za padsychajučaha dna i ciny. Miascovyja raspaviadajuć: niekali paŭnavodny i navat padstupny Nioman ciapier miescami možna pierajści ŭbrod — vady pa kalena. Raka źmialeła nastolki, što ŭ miežach horada na pavierchniu vyjšli navat apory starych draŭlanych mastoŭ i prystaniaŭ, pabudavanych jašče ŭ pačatku XX stahodździa.
Hazony ŭ Hrodnie vyhareli
Kvietniki i pasadki maładych dreŭ palivajuć ciapier kožny dzień. Narmalna pakul pracuje tolki HES. Ale kali ŭzrovień vady ŭpadzie jašče nižej — abstalavańnie spynicca. U haspadarcy «Filijał Skidzielski» Hrodzienskaha rajona ŭžo padličvajuć straty: chutka žnivo, tolki voś prybirać niama čaho. Litaralna na vačach raśliny ŭ palach hinuć. U haspadarcy amal 80% ziemlaŭ — piaski i supiaski. U zasuchu jany pieršymi patrapili pad udar. I kali kukuruza i cukrovyja buraki jašče padnimucca, to pšanicu i jačmień pryjdziecca prosta vykinuć. Ahraryi ŭ terminovym paradku sprabujuć vyratavać choć niešta.
Pakutujuć ad zasuchi i lasy
U Hrodzienskaj vobłaści ŭstanoŭleny maksimalny, piaty, uzrovień pažarnaj niebiaśpieki. Uvachod — pad strohaj zabaronaj. U Hožskim laśnictvie zaraz samaja składanaja ŭ akruzie situacyja — z 12 tysiač hiektaraŭ dźvie traciny — ihličnyja drevy (najbolš adčuvalnyja — zaharajucca jak zapałki). Leśniki kažuć: pasadžany na subotnikach u krasaviku maładniak naŭrad ci vyžyvie.
Kamientary