Ułady Turkmienistana zabaranili vyjezd za miažu bolšaści hramadzian
Ułady Turkmienistana zabaranili pakidać krainu ŭsim hramadzianam, jakija nie dasiahnuli 40 hadoŭ. Pra heta ŭ sieradu, 27 červienia, paviedamlaje «Radyjo Azatłyk».
Pavodle infarmacyi karespandenta vydańnia ŭ horadzie Dašahuz, žychary šerahu nasielenych punktaŭ źviarnulisia ŭ mihracyjnuju słužbu za nieabchodnym dla atrymańnia turystyčnaj vizy dazvołam. Čynoŭniki ŭ vydačy daviedak admovili, patłumačyŭšy svaje dziejańni niejkim «rasparadžeńniem źvierchu».
«Supracoŭniki mihracyjnaj słužby skazali, što źvierchu pastupiła rasparadžeńnie, pavodle jakoha ciapier nikomu da dasiahnieńnia 40 hadoŭ dazvoł na vyjezd nie dajuć. Na pytańnie pra pryčynu zabarony, skazali, što ŭ viłajacie [vobłaści] nie zastałosia nikoha zdolnaha pracavać. Skazali, što kali vy ŭsio pajedziecie — chto ž pracavać budzie», — raspavioŭ surazmoŭca «Radyjo Azatłyk».
Pradstaŭniki mihracyjnaj słužby krainy infarmacyju nie paćvierdzili i nie abvierhli. «Radyjo Azatłyk» adznačaje, što ŭłady Turkmienistana i ŚMI respubliki pra zabarony na vyjezd z krainy aficyjna nie abviaščajuć.
Pa słovach miascovych naziralnikaŭ, z-za dalejšaha ekanamičnaha kryzisu, jaki supravadžajecca biespracoŭjem, rostam cen i deficytam charčavańnia, mihracyja, u pieršuju čarhu pracoŭnaja, nabyła masavy charaktar.
Kamientary