Vajskoviec Alaksiej Mianzurenka zahinuŭ 30 červienia, a praź niekalki dzion paśla praciahłaj chvaroby pamior jaho baćka. U čaćvier, 5 lipienia, u Oršy mužčyn pachavali pobač na adnych mohiłkach, paviedamlaje Tut.by.
— 30 červienia ŭ 120 asobnaj miechanizavanaj bryhadzie zahinuŭ aficer-kapitan. Upaŭ na terytoryi parku techniki, atrymaŭ traŭmu hałavy. Adnak byŭ dastaŭleny nie ŭ miedycynskuju ŭstanovu, a pa miescy pražyvańnia — u internat. Tam i pamior, — napisaŭ u redakcyju čytač.
Jak daviedaŭsia Tut.by, pamierłaha vajskoŭca zvali Alaksiej Mianzurenka. Jamu było 29 hadoŭ, u jaho zastaŭsia maleńki syn.
— Učora Lošku pachavali razam z baćkam, u adzin dzień. Ludzi išli za dźviuma trunami, — raspaviadaje Tut.by svajačka zahinułaha aficera. — Ź Minska pryjechali chłopcy, kalehi Alaksieja, hraŭ arkiestr. Što ź im kankretna zdaryłasia, tołkam nichto nie viedaje, zdajecca, była hiematoma. Cieła Alaksieja piać dzion pralažała ŭ morhu, a 3 lipienia paśla praciahłaj chvaroby pamior Alošaŭ baćka. Ich vyrašyli pachavać pobač.
Da trahiedyi Alaksiej Mianzurenka žyŭ u pakoi ŭ internacie. Jaho mama Śviatłana ŭžo pryjazdžała z Oršy ŭ Minsk na razmovu da śledčaha, ale, pryznajecca žančyna, była ŭ takim šokavym stanie, što mała što pamiataje z toj razmovy.
— Kali ŭsio zdaryłasia, Lošu advieźli nie ŭ balnicu, a ŭ internat, pakłali ŭ pakoi i paprasili susiedku pryhladać za im. Jana prychodziła ŭ 23.00 [29 červienia. — Zaŭv. Tut.by], jon jašče byŭ žyvy, spaŭ, a ranicaj 30-ha — užo miortvy, — płača Śviatłana, mama zahinułaha vajskoŭca. — Uskryćcio pakazała, što ŭ jaho «tupaja traŭma hałavy». Nijakich padrabiaznaściej nie viedaju: jon sam upaŭ, jaho šturchnuli ci ŭdaryli. Čamu dziciaci nie dali miedycynskuju dapamohu? Što ja zaraz mahu zrabić — u mianie ŭ domie było dva pachavańni.
U pakoj syna ŭ internacie žančyna nie zmahła trapić, jon byŭ apiačatany.
— 30 červienia, znachodziačysia doma, u internacie, pamior aficer. Pryčyny śmierci vyśviatlajucca kampietentnymi orhanami, — prakamientavaŭ zdareńnie Tut.by Uładzimir Makaraŭ, pres-sakratar Ministerstva abarony.
«Zapuskajcie dalej saluty, a ja vykliču milicyju». Biełarusy spračajucca pra zabaronu na fiejervierki2
Kamientary