U Biełarusi raźličvajuć stvaryć na asnovie dziaržaŭnaj ułasnaści kampaniju, jakaja funkcyjanuje pa pryncypach kitajskaj karparacyi CITIC Group. Pra heta Alaksandr Łukašenka zajaviŭ siońnia na sustrečy sa staršynioj praŭleńnia kitajskaj karparacyi CITIC Group Čan Čžeńminam.
«Ja pierš za ŭsio chaču vas pavinšavać ź vialikim pośpiecham — vy viadučaja kampanija ŭ śviecie. Ja adkryta zajzdrošču Kitajskaj Narodnaj Respublicy, što jana vałodaje takimi kampanijami. Byŭ by vielmi vam udziačny, kali b vy padkazali nam, jakim čynam na asnovie dziaržaŭnaj ułasnaści stvaryć padobnuju kampaniju ŭ Biełarusi. Chaj nie takuju vielizarnuju, ale na takich ža pryncypach, jak funkcyjanuje vaša kampanija», — skazaŭ Alaksandr Łukašenka.
«Nidzie nikoli nie chavaŭ, ni ŭ vas u Kitajskaj Narodnaj Respublicy na pieramovach z maim siabram Si Czińpinam, ni tut u Biełarusi, ni ŭ Rasii, ni ŭ Amierycy, što z najvialikšym zadavalnieńniem staŭlusia da vas i vašaj kampanii. Ja prosta hanarusia, kažu heta ad imia biełaruskaha naroda, što my supracoŭničajem z takoj vialikaj kampanijaj «, - zajaviŭ kiraŭnik krainy.
CITIC Group ŭžo realizavała ŭ Biełarusi niekalki prajektaŭ. «Niachaj maštaby hetych prajektaŭ - nie maštaby vašaj kampanii, ale heta pačatak. Ja vam dziakuju za toje, što vy dapamahli stvaryć u nas u Biełarusi ŭpieršyniu za našu niezaležnuju historyju aŭtamabilny zavod. Nakolki ja infarmavany, tam spravy iduć niadrenna. Dumaju, kali my z vami padklučymsia, jany buduć jašče lepš», - adznačyŭ kiraŭnik dziaržavy. Jon taksama padziakavaŭ CITIC Group za dapamohu ŭ madernizacyi biełaruskich cemientnych zavodaŭ i Aršanskaha lnokambinata.
Kamientary