Francužanka Alize Karne źniała majku na korcie US Open — i źmianiła praviły suśvietnaha tenisu
U pieršym tury Adkrytaha pieršynstva ZŠA pa tenisie 31-ja rakietka śvietu Aliz' Karne atrymała niečakanaje papiaredžańnie ad sudździ na vyšcy za toje, što źniała na korcie majku.
28-hadovaja francužanka hulała svoj pieršy matč na turniry ŭ 38-hradusnuju śpioku i ŭ pierapynku pamiž druhim i trecim setami pajšła ŭ raspranalniu, kab pieraapranucca.
Viarnuŭšysia na kort, jana pabačyła, što nadzieła majku navyvarat, tut ža źniała jaje i nadzieła jak treba. Što praŭda, pad majkaj byŭ ružovy top.
Sapraŭdy, praviły abviaščajuć, što žančyny na US Open nie mohuć pieraapranacca na korcie i abaviazany pajści dziela hetaha ŭ raspranalniu. Zhodna z praviłami, Karne dapuściła parušeńnie kodeksa hulca.
Takoje parušeńnie pryraŭnoŭvajecca da niecenzurnaj łajanki i inšych nieprystojnych dziejańniaŭ hulca pamiž rozyhryšami. Pieršaje takoje parušeńnie pahražaje papiaredžańniem, druhoje — pazbaŭleńniem ačka, treciaje — prajhranym hiejmam, a čaćviortaje — paražeńniem u matčy.
Alize prajhrała ŭ troch setach šviedcy Jochanie Łarsen, ale niaznačny, zdavałasia b, incydent ź pieraapranańniem francužanki zasłanili spartyŭny vynik matča.
Sprava ŭ tym, što ŭ śpioku na kortach «Fłašynh-Miedoŭz» možna rehularna bačyć tenisistaŭ-mužčyn, jakija zdymajuć u pierapynku pamiž hiejmami majki, i nikomu navat nie prychodzić u hałavu rabić im zaŭvahi i tym bolš aficyjnyja papiaredžańni.
Akramia taho, tenisisty časta pieraapranajucca ŭ pierapynku pamiž hiejmami, siedziačy pobač z kortam. A śpioka ŭ hetym hodzie na kortach US Open nievynosnaja: u mužčynskaj sietcy ŭžo piać tenisistaŭ źnialisia z turniru.
Rašeńnie sudździ mnohija paličyli nieapraŭdanym: byłaja aŭstralijskaja tenisistka Kiejsi Dełakvo nazvała jaho śmiechatvornym, a piacirazovaja čempijonka turniraŭ Vialikaha šlema ŭ parnym razradzie Bietani Matek-Sands — ščyra słabym.
U vyniku kiraŭnictva WTA zajaviła, što Alize Karne niezasłužana atrymała papiaredžańnie i pakarana nie budzie. Asacyjacyja vyrašyła rastłumačyć praviły: zaraz tenisistki mohuć nie sychodzić u raspranalniu, kab pieraapranucca.
«Heta rašeńnie nie było zasnavana na praviłach WTA, tak jak u WTA niama pravił, jakija zabaraniajuć pieraapranać spartyŭnuju vopratku na korcie, — havorycca ŭ zajavie asacyjacyi. — Hetaje praviła turniru Vialikaha šlema, i my rady, što USTA (Asacyjacyja tenisa Złučanych Štataŭ) zaraz jaho źmianiła».
«Usie tenisisty i tenisistki mohuć pieraapranać svaje majki, siedziačy ŭ kreśle dla hulcoŭ, heta nie źjaŭlajecca parušeńniem Kodeksa, — havorycca ŭ zajavie US Open. — Spartsmienki pry žadańni mohuć pieraapranuć svoj top u bolš zacišnym miescy pobač z kortam, kali jano jość. Chutkaja źmiena spartyŭnaj vopratki nie budzie ličycca ŭziatym tenisistkaj pierapynkam».
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary