Što za hijałuronavaja kisłata, z dapamohaj jakoj skakuny z tramplina pavialičvali pienisy dziela lepšych vynikaŭ
Niadaŭna Suśvietnaje antydopinhavaje ahienctva (WADA) zajaviła, što vyvučyć paviedamleńni pra mahčymaje vykarystańnie spartsmienami injekcyj hijałuronavaj kisłaty dla časovaha źmianieńnia paramietraŭ cieła — dakładniej, adnoj važnaj častki cieła. Raskazvajem, što heta za rečyva i na jakija jašče chitryki iduć skakuny z tramplina.
U skačkach z tramplina vynik časta vyrašajuć santymietry i navat milimietry. Jak pakazała niadaŭniaje daśledavańnie, navat niaznačnyja źmieny ŭ kanstrukcyi kaściumaŭ dla skačkoŭ mohuć dazvolić spartsmienam pralatać dalej.
Łyžny kaścium moža pracavać jak svojeasablivy parašut: čym bolšy jaho ahulny pamier, tym bolšaja płošča pavierchni, što ŭpłyvaje na palot.
Kožnyja dadatkovyja dva santymietry dapuščalnaha pavieličeńnia pamieru kaściuma dadajuć kala 5% padjomnaj siły i prykładna 4% supracivu pavietru.
Za košt hetaha skakuny mohuć dadać da vyniku na tramplinie daŭžynioj 130 mietraŭ jašče piać—šeść mietraŭ, zapavolvajučy źnižeńnie i zachoŭvajučy haryzantalnuju chutkaść.
Tamu spartsmieny roznymi sposabami imknucca pavialičyć pamiery kaściumaŭ i, jak ni dziŭna, u pachavaj vobłaści, bo mienavita jana słužyć bazavaj kropkaj pry vyznačeńni dapuščalnych pamieraŭ kaściuma.
Pierad pačatkam siezona ŭsich skakunoŭ abaviazkova vymiarajuć z dapamohaj 3D-skaniera. Asablivuju rolu adyhryvaje tak zvanaja «vyšynia kroku» — adlehłaść ad padłohi da pachviny. Hety paramietr źjaŭlajecca bazavym dla pašyvu kaściuma.
Praviły stroha rehulujuć jaho paramietry: dapuščalny luft składaje ŭsiaho 2‑4 santymietry, a vyšynia kroku ŭ mužčynskim kaściumie moža być maksimum na 3 santymietry bolšaj za faktyčnuju vyšyniu pachviny samoha spartsmiena.
Kali spartsmienu ŭdajecca štučna zrušyć hetuju kropku nižej, jon aŭtamatyčna atrymlivaje bolšuju płošču kaściuma, što stvaraje dadatkovuju padjomnuju siłu padčas palotu.
Ad parałonu da injekcyj: evalucyja chitraściaŭ
U minułym, kali vymiareńni pravodzilisia ŭručnuju, spartsmieny dziela lepšych vynikaŭ kłali parałon vakoł jaječak abo vykarystoŭvali silikonavyja ŭstaŭki ŭ preziervatyvach. Adnak ciapier vykarystańnie starońnich pradmietaŭ praktyčna niemahčymaje: padčas abmieraŭ, jakija pravodziacca ŭ nižniaj bialiźnie, zaŭsiody prysutničaje miedycynski piersanał, što ažyćciaŭlaje pilny kantrol. Tamu spartsmieny, jak śćviardžajecca, šukajuć inšyja šlachi.
Na čempijanacie śvietu 2025 hoda dva narviežskija pryziory — Maryjus Lindvik i Jochan Andre Forfanh — atrymali trochmiesiačnyja dyskvalifikacyi paśla taho, jak vyśvietliłasia, što ŭ ich kamandzie tajemna karektavali švy kaściumaŭ u pachavaj zonie. Padčas płanavaj pravierki było ŭstanoŭlena, što ełastyčny materyjał u rajonie pachviny mieŭ praźmiernuju žorstkaść.
Kali kaściumy rasparoli, unutry vyjavili ŭšytyja armavanyja nitki, jakija štučna pavialičvali płošču pavierchni tkaniny. Hałoŭny trenier, jaho asistent i supracoŭnik zbornaj byli adchilenyja ad pracy na 18 miesiacaŭ.
U studzieni niamieckaje vydańnie Bild paviedamiła, što atlety nibyta znajšli novy sposab abyści sistemu 3D-skanavańnia — injekcyi hijałuronavaj kisłaty ŭ pałavy orhan.
Na minułym tydni padčas pres-kanfierencyi pierad zimovaj Alimpijadaj kiraŭnictvu Suśvietnaha antydopinhavaha ahienctva (WADA) daviałosia adkazvać na pytańnie, ci adpaviadajuć hetyja źviestki rečaisnaści.
Hienieralny dyrektar WADA Aliŭje Nihli adznačyŭ, što ahienctva pakul nie vałodaje detalovaj infarmacyjaj, ale hatova vyvučyć hetaje pytańnie ŭ vypadku źjaŭleńnia kankretnych faktaŭ, kab zrazumieć, ci moža havorka iści pra dopinh.
U svaju čarhu dyrektar pa kamunikacyjach Mižnarodnaj fiederacyi łyžnaha sportu i snoŭbordynha (FIS) Bruna Sasi zajaviŭ, što na hety momant niama nijakich paćviardžeńniaŭ abo dokazaŭ taho, što chto-niebudź sa spartsmienaŭ sapraŭdy karystaŭsia takimi injekcyjami.
Što za hijałuronavaja kisłata
Hijałuronavaja kisłata — heta naturalnaje rečyva, jakoje pieršapačatkova prysutničaje ŭ arhaniźmie kožnaha čałavieka, u skury, sustavach i vočnych jabłykach. Jana viadomaja svajoj unikalnaj zdolnaściu ŭtrymlivać vilhać: navukova dakazana, što adna malekuła hetaj kisłaty moža źviazvać kolkaść vady, jakaja ŭ tysiaču razoŭ pieravyšaje jaje ŭłasnuju vahu. Dziakujučy hetym ułaścivaściam preparat nabyŭ šyrokuju papularnaść u sučasnaj kaśmietałohii i miedycynie.
Hijałuronavuju kisłatu časta vykarystoŭvajuć u vyhladzie fileraŭ dla tvaru: robiać injekcyi ŭ vusny dla nadańnia im dadatkovaha abjomu, karektujuć formu skuł abo zapaŭniajuć hłybokija marščyny. Akramia estetyčnych met, jaje šyroka ŭžyvajuć i ŭ miedycynie — naprykład, u vyhladzie ŭkołaŭ u sustavy dla palapšeńnia ich ruchomaści i zmazki tkanak.
Kali ž razhladać mahčymy vypadak sa skakunami z tramplina, to vykarystoŭvajecca toj samy pryncyp, što i pry pavieličeńni vusnaŭ. U sučasnaj mužčynskaj urałahičnaj i płastyčnaj praktycy prymianiajucca ščylnyja filery na asnovie hijałuronavaj kisłaty.
Pry ŭviadzieńni rečyva niepasredna pad skuru pałavoha orhana možna damahčysia časovaha pavieličeńnia jaho abchvatu (ale nie daŭžyni) na adzin-dva santymietry, pryčym efiekt moža zachoŭvacca ad 6 da 18 miesiacaŭ.
Bijasumiaščalnaść i naturalny vyhlad orhana paśla injekcyi dazvalajuć nieprykmietna prachodzić navat pilny miedycynski kantrol. Pry hetym lišni abjom u pachvinie zanižaje «kropku kroku», što daje prava na šyrejšy kaścium ź lepšaj aeradynamikaj.
Pavodle infarmacyi Bild, asobnyja nacyjanalnyja zbornyja chacieli b, kab pierad Alimpijskimi hulniami FIS praviała dadatkovyja paŭtornyja 3D-abmiery, kab vypravić mahčymyja pamyłki abo złoŭžyvańni. Adnak kiraŭnik pa materyjałach FIS Macijas Chafiele zajaviŭ, što pakul hetaha rabić nie płanujecca, choć unutry fiederacyi ŭžo viadziecca praca nad udaskanaleńniem mietodyki. Meta — zrabić tak, kab vyznačalnaj pry vymiareńni była budova škileta (a mienavita kostki taza), a nie miakkija tkanki.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary