Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta
Babula, jakaja padaryła ŭnučcy kvateru, u sudzie skazała, što nie pamiataje, jak padpisvała papiery. Nataryusu, jaki staŭ na bok unučki i kazaŭ, što babula była adekvatnaja, nie pavieryli.
«Ci možacie vy ŭjavić, što ŭ Biełarusi, u horadzie Breście, rodny baćka z babulaj z dapamohaj machlarskaj schiemy adsudzili ŭ svajoj dački/unučki kvateru? A mnie i ŭjaŭlać nie treba. Jak heta raspaŭsiudzić, kab pra hetuju historyju daviedałasia jak maha bolš ludziej?», — napisała ŭ sacsietkach pra svoj bol bresckaja fatohrafka Ułada Tempieramientava.
Pavodle słoŭ dziaŭčyny, babula Antanina padaryła joj kvateru. Usio aficyjna, praz nataryusa. Ułada adznačaje, što razam z mužam čatyry hady rabiła tam ramont z nula: «My ŭkłali ŭ ramont kala 25 tysiač dalaraŭ. Nichto, akramia nas, tam nie žyŭ».
Adnak paśla taho jak jaje baćka Jarasłaŭ Tempieramientaŭ daviedaŭsia, kolki kaštuje kvatera, zahareŭsia žadańniem adsudzić nieruchomaść. Jon vyrašyŭ dakazać, što babula była nieadekvatnaj, kali daryła ŭnučcy nieruchomaść — i ŭ jaho atrymałasia.
«Samaje śmiešnaje, što babula asabista papiaredžvała mianie pa telefonie, što baćku patrebnyja hrošy i jon choča adsudzić u mianie kvateru. A potym u sudzie kazała, što nie razumieła, što robić. I naohuł nie viedaje, adkul uzialisia jaje podpisy i prapanovy, napisanyja ad ruki ŭ damovie», — narakaje Ułada.
«Nataryus u sudzie śviedčyŭ, što prykmiet zabłytvańnia abo prymusu nie było, babula sama zapisałasia na pryjom i vyrazna vykazała žadańnie padaryć kvateru. Adnak sud nie pryniaŭ hetyja arhumienty», — raspaviadaje brestčanka.
Sud pryznaŭ dareńnie niesapraŭdnym, a značyć, kvatera — užo adramantavanaja — vierniecca babuli.
Dziaŭčyna spadziajecca, što Viarchoŭny sud raźbiarecca i viernie joj kvateru, ale viera ŭ biełaruskaje pravasudździe ŭ jaje ŭžo pachisnułasia.
«Nikoli nie afarmlajcie ŭ Biełarusi ździełki kupli-prodažu, dareńnia abo zaviaščańnia ŭ nataryusa bieź śviedkaŭ i bieź videa-/aŭdyjazapisu. Nichto nie zastrachavany ad takoha padmanu, navat ad samych blizkich ludziej», — padsumoŭvaje Ułada. Z baćkam jana bolš nie kamunikuje.
Dziaŭčyna dadaje cikavuju detal — pamiž sudami baćka sprabavaŭ napisać na jaje zajavu za toje, što jana nibyta skrała ŭ jaho svoj ža dziciačy rovar. «Rovar stajaŭ u mianie ŭ padvale kala čatyroch hadoŭ i ličyŭsia maim, ale jon vyrašyŭ, što mianie abaviazkova treba pryciahnuć da kryminalnaj adkaznaści. Pazoŭ u vyniku adchilili», — raskazvaje Ułada.
Historyja vyklikała rezanans u sacsietkach: karystalniki abmiarkoŭvali, što rabić u takoj situacyi. Naprykład, chacia b ździerci špalery na raźvitańnie. «Usio, što naša — a tam usio naša — my zabiarom», — zapeŭniła dziaŭčyna.
«Baćka baicca publičnaha hańbavańnia i praŭdy. Jon telefanuje ŭsim znajomym i raspaviadaje, što ŭ jaho ašukancy skrali kvateru. Mnie hetyja znajomyja paśla hetaha pišuć i pytajuć, ci ŭsio ŭ jaho ŭ paradku z hałavoj. I jon nie adkazvaje na maje paviedamleńni, mahčyma, pačućcio soramu prysutničaje», — raskazvaje kamientatataram Ułada.
Chto ž taki hety baćka, jaki adcisnuŭ kvateru ŭ dački? Havorka pra padpałkoŭnika milicyi ŭ adstaŭcy Jarasłava Tempieramientava.
Jamu 54 hady. Raniej jon uznačalvaŭ Maskoŭski adździeł (Bresta) Departamienta achovy MUS. U 2013 hodzie byŭ zvolnieny pa stanie zdaroŭja.
A babula, Antanina Tempieramientava, doŭhi čas pracavała nastaŭnicaj. Joj ciapier 78 hadoŭ.
«Naša Niva» — bastyjon biełaruščyny
PADTRYMAĆCiapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja50
Kamientary
Heta ŭžo nie prosty zaškvar, heta prytča