U internecie źjavilisia vydumanyja hutarki sa znakamitymi biełaruskami. Pieršaj hierainiaj stała Rahnieda
Ilustratarka Volha Niasnova i žurnalistka Valeryja Baraviec vykłali ŭ internet pieršuju fikšn-hutarku u miežach ich novaha prajekta Girls Power pra «lehiendarnych ledzi našaj krainy». Raspačynajecca prajekt z aŭtabijahrafičnaha manałoha Rahniedy.
Ideja stvaryć u Biełarusi prajekt pra našych buntarak raspačałasia paśla znajomstva Voli z padobnymi inicyjatyvami ŭ inšych krainach (kštałtu knihi «Kazki na noč dla maleńkich buntarak» ci ukrainskaha vydańnia «Siła divčat»).
«Vola natchniłasia hetaj temaj i raspaviała mnie, što choča zrabić niešta padobnaje ŭ Biełarusi. U nas situacyja z pavahaj da asoby, z roŭnymi mahčymaści dla dziaŭčat i mužčyn palapšajecca, ale vielmi marudna. Nam sa svajho boku zachaciełasia ŭ hety praces ukinuć piać kapiejek i napisać pra toje, što nam samim zdajecca natchnialnym: pra žančyn u biełaruskaj historyi, jakija niečaha damahlisia, na niešta paŭpłyvali. Chaciełasia znajści ich unutranuju siłu, dastać jaje z padručnikaŭ i zrabić na hetym akcent», — raskazvaje Lera.
Dziaŭčaty doŭha vyrašali, u jakim vyhladzie ŭsio heta realizoŭvać. Spačatku padumvali pisać niešta kštałtu aŭtarskich ese ź ilustracyjami, ale ŭ vyniku pryjšli da takoha žanru jak fikšn-intervju. Pryčyny tamu prostyja:
«Heta niesurjozny žanr, ale mienavita taki my i chacieli. Pa-pieršaje, tamu što nie historyki. Kali b usio było surjozna, natoŭp z navukoŭcaŭ užo čakaŭ by nas dzie-niebudź u fejsbuku, kab raspavieści, što my ŭsio robim niapravilna. U našym prajekcie bolš mastackaha, čym dakumientalnaha. Pa-druhoje, my prosta pakazvajem toje, što nam samim zdajecca cikavym, kab dalej natchnić ludziej samastojna źviarnucca da histaryčnych krynic, kali tema ich zachopić».
Vola stvaraje dla prajekta ilustracyi, a Lera piša teksty. Pierš, čym źjavicca kančatkovy varyjant, dziaŭčaty vyvučajuć padručniki, internet-krynicy, natchniajucca kaściumami i inšymi rečami, jakija mohuć niešta raspavieści pra charaktar hieraini.
Vybirajucca asoby pa niekalkich kryteryjach: piersanažy pavinny natchniać i matyvavać, a taksama vydzialacca luboŭju da rodnych miescaŭ. Tak, adnoj z nastupnych hieraiń u prajekcie budzie, naprykład, Jefrasińnia Połackaja.
Razvažajučy pra mety, Lera i Vola spadziajucca, što ich ideja i jaje realizacyja matyvujuć roznych ludziej vieryć u siabie, nie dumajučy pra naviazanyja, prydumanyja miežy.
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3737
Kamientary