Ptuškaj hoda — 2019 u Biełarusi staŭ adzin z samych redkich drapiežnikaŭ Jeŭropy
Na źmienu sioletniamu kryłatamu simvału — čornahałovamu ščyhiełu — prychodzić vialiki arlec, paviedamlaje sajt hramadskaj arhanizacyi «Achova ptušak Baćkaŭščyny».
Vialiki arlec — adna z samych redkich drapiežnych ptušak Jeŭropy, joj pahražaje hłabalnaje źniknieńnie. Adna z najbolšych jaje papulacyj u śviecie hniazdujecca ŭ Biełarusi. 120-150 par hetych ptušak žyvie ŭ našych lasach — heta bolš, čym va ŭsim Jeŭrasajuzie.
Hetyja arlacy lubiać hłuchija miaściny na bałotach i la bałot, dalej ad čałavieka.
Vialikamu arlacu pahražaje šmat faktaraŭ: źniknieńnie nizinnych bałot — hałoŭnych miescaŭ pražyvańnia hetaj ptuški, čałaviečaja prysutnaść u hniezdavy pieryjad: kali niechta ŭ hety čas budzie chadzić pad hniazdom, vialiki arlec jaho pakinie. Budaŭnictva daroh na Almanskich bałotach, zbor jahad na hniezdavych učastkach — heta ŭsio niehatyŭnyja faktary. Taksama pahrozu niasie pamianšeńnie raznastajnaści vidaŭ zdabyčy ŭ miescach palavańnia arlaca — kulikoŭ, pastuškovych, kačak. Heta ahulnaja tendencyja pa ŭsim Paleśsi.
Kab zachavać papulacyju vialikaha arlaca ŭ Biełarusi, APB užo niekalki hadoŭ pravodzić akcyju «Vyratuj arlania!», hrošy na jakuju sabirali kraŭdfandynham.
Vialikija arlacy ŭžo adlacieli na poŭdzień. Letaś śpiecyjalisty APB prymacavali pieradatčyki na 8 arlacoŭ. Za ich mihracyjaj i pieramiaščeńniami na zimoŭcy ŭ Hrecyi i Afrycy možna sačyć na mapie ptushki.org/eagle.
Nacyjanalnuju kampaniju «Ptuška hoda» APB pravodzić z 2000 hoda, kab pryciahnuć uvahu ludziej da dzikich ptušak Biełarusi. Ptušku hoda z troch kandydataŭ abirajuć siabry APB ŭ hałasavańni na štohadovym źjeździe.
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary