Zabarona moža ŭstupić u siłu ŭžo ŭ pačatku 2019 hoda, što adabjecca na pracy sietak 5G ŭ ZŠA. Raniej prezident Tramp zabaraniŭ amierykanskim ministerstvam kuplać pradukcyju kitajskich kampanij. Pra heta paviedamlajuć krynicy Reuters, znajomyja ź situacyjaj.
Prezident ZŠA Donald Tramp płanuje ŭ studzieni ŭvieści režym nadzvyčajnaj situacyi ŭ krainie, z-za čaho amierykanskija kampanii pazbaviacca mahčymaści kuplać telekamunikacyjnaje abstalavańnie Huawei i ZTE.
Pavodle infarmacyi krynic zabarona prapisana ŭ vykanaŭčym ŭkazie Trampa, jaki razhladajecca ŭžo bolš za vosiem miesiacaŭ. Upieršyniu pra jaho paviedamlała hazieta The Wall Street Journal ŭ traŭni.
U dakumiencie ŭtrymlivajecca pradpisańnie ministerstvu handlu zabaranić amierykanskim kampanijam kuplać abstalavańnie ŭ zamiežnych firmaŭ, jakija pradstaŭlajuć «značnyja ryzyki dla nacyjanalnaj biaśpieki». Vykanaŭčy ŭkaz moža być vypuščany na padstavie pałažeńniaŭ zakona ab nadzvyčajnych mižnarodnych ekanamičnych dziejańniach, zhodna ź jakim prezident moža ŭmiešvacca ŭ pytańni handlu ŭ adkaz na pahrozy dla ZŠA.
Krynicy adznačajuć, što praca nad tekstam ukazu pakul nie zavieršanaja, pry hetym u im nie buduć prapisanyja miery kankretna suprać Huawei i ZTE. Adnak majecca na ŭvazie, što čynoŭniki ŭ Minhandli rastłumačać dakumient nie na karyść kitajskich karparacyj.
U vypadku, kali ŭłady ŭviaduć zabaronu na kuplu telekamunikacyjnaj pradukcyi Huawei i ZTE, u ZŠA moža sarvacca zapusk 5G, pakolki bujnyja amierykanskija kampanii ciapier šukajuć partnioraŭ dla zakupki bazavych stancyj dla sietak piataha pakaleńnia. Šmatlikija apieratary suviazi ŭ ZŠA, jakija karystajucca tannaj pradukcyjaj Huawei i ZTE, aścierahajucca, što z-za rasparadžeńnia Trampa im pryjdziecca admovicca ad kitajskaha abstalavańnia biez kampiensacyi z boku ŭrada.
U žniŭni 2018 hoda Tramp padpisaŭ zakon ab abaronnym biudžecie ZŠA, u jakim źmiaščajecca zabarona na zakupku abstalavańnia ad kitajskich kampanij dla amierykanskich ministerstvaŭ i viedamstvaŭ sa žniŭnia 2019 hoda. Havorka išła pra abstalavańnie Huawei i ZTE, a taksama ich daččynych kampanij. U Demakratyčnaj partyi taksama zaklikali svaich členaŭ admovicca ad vykarystańnia kitajskich smartfonaŭ. Ułady ZŠA padazrajuć Piekin u vykarystańni pradukcyi Huawei i ZTE dla špijanažu, kitajskija kampanii admaŭlali ŭsie abvinavačańni.
Kamientary