U Radaškovičach źniasuć davajenny budynak škoły FOTY
Davajennuju škołu ŭ Radaškovičach 1939 hodu pabudovy, vidać, čakaje sumny los.
Čutki pra toje, što pabudovu vykupili, i na jaje miescy źjavicca mahazin, u miastečku chadzili daŭno. A sam budynak, jaki nie vykarystoŭvajecca ŭžo niekalki hod, pacichu razvalvajecca.
Pra heta «Našaj Nivie» raskazała kiraŭnica spravami Radaškovickaha pasiałkovaha vykanaŭčaha kamiteta Ina Pustachod:
«Hety budynak za apošnija hady try źmianiŭ niekalkich haspadaroŭ. Apošniaje, što ŭ im było — heta dziciačaja muzyčnaja škoła.
Budynak znachodzicca ŭ nadzvyčaj avaryjnym stanie, a pakolki jon nie maje historyka-kulturnaj kaštoŭnaści, to ja mahu tolki zdahadvacca, što jaho mohuć źnieści».
Miž tym, miascovy krajaznaŭca Uładzimir Sadoŭski bje tryvohu:
«Budynak škoły kaštoŭny tym, što heta ŭzor školnaj architektury 1930-ch hadoŭ i faktyčna pieršy śpiecyjalizavany školny budynak u Radaškovičach. Raniej navučalnyja ustanovy raźmiaščalisia ŭ prystasavanych budynkach. U mižvajennaj Polskaj respublicy isnavała prahrama pabudovy škoł, zvyčajna im davali imia Piłsudskaha, adna z takich prahram była realizavana ŭ Vilenskim vajavodstvie, da jakoha naležali Radaškovičy. U jaje miežach i była pabudavanaja škoła. Budaŭnictva było zakončana ŭ 1939 hodzie, ale polskaj škołaj jana pabyła nie doŭha, užo paśla 17 vieraśnia 1939 hoda tut raźmiaściłasia savieckaja škoła».
Staršynia Radaškovickaha pasiałkovaha vykanaŭčakaha kamiteta Viktar Niekazakaŭ zapeŭnivaje, što nijakaha mahazina na miescy škoły nie budzie: «Siem hadoŭ jak pradali hety budynak. I pa ŭsim vidać, što ciapierašni haspadar nie płanuje ničoha tut rabić».
Ciapier budynak naležyć tavarystvu z abmiežavanaj adkaznaściu «Profdeviełopier». U kampanii tłumačać, što ŭ pašparcie budynka hod pabudovy paznačany jak 1959:
«Davajcie nie budziem nadavać stolki ŭvahi sastarełamu budynku ŭ avaryjnym stanie. My majem na rukach zaklučeńnie ekśpiertyzy, što hety budynak nieprydatny da ekspłuatacyi, u im vielmi vysokaja stupień znosu. My razhladali mahčymaść jaho adramantavać, ale jon vielmi niebiaśpiečny. I heta niemetazhodna».
«Jość sotni prykładaŭ taho, jak paśla vajny davajennyja budynki atrymlivali pašparty z pamyłkovymi datami pabudovy. Budavać draŭlanuju škołu ŭ 1959 hodzie ŭžo było mavietonam. Navat u bujnych vioskach stavili cahlanyja, nie toje što ŭ rajcentry, jakim byli Radaškovičy. Škada, što va ŭłaśnika niama nijakich dumak pra prystasavańnie pad jaki-niebudź abjekt», — adkazvaje krajaznaŭca Uładzimir Sadoŭski.
Kamientary