Dyrektar kaledža patłumačyŭ, navošta ŭ studentaŭ patrabavali akaŭnty ŭ sacsietkach
«Na žal, kuratar dapuściŭ surjozny promach u hutarcy z navučencami», — raspavioŭ Tut.by dyrektar mahiloŭskaha politechničnaha kaledža Siarhiej Kazłoŭ. Jon daŭ razhornuty kamientar pra toje, čamu studentaŭ 7 lutaha prasili napisać ich akaŭnty ŭ sacyjalnych sietkach u admysłovym pratakole. I patłumačyŭ, ci było patrabavańnie dać łahin i parol ad asabistaj staronki.
Čytajcie taksama:
U kaledžy Mahilova studentam skazali napisać adrasy svaich akaŭntaŭ u sacyjalnych sietkach. Jany admovilisia
Pa słovach dyrektara kaledža Siarhieja Kazłova, adzin z navučencaŭ kaledža sapraŭdy fihuruje ŭ spravie ab raspaŭsiudžvańni parnahrafii i ekstremizmu ŭ internecie. Tamu prafiłaktycy złačynstvaŭ u hetaj śfiery vyrašyli nadać asablivuju ŭvahu.
Tamu ŭ kaledž zaprasili pradstaŭnika pravaachoŭnych orhanaŭ, abmierkavali temu na piedahahičnaj radzie, sieminary piedahahičnych rabotnikaŭ i vyrašyli pravieści kuratarskija hadziny ŭ hrupach pa hetaj temie ŭ čaćvier, 7 lutaha.
Na kuratarskich hadzinach sa studentami pavinny byli razhledzieć artykuły Kryminalnaha i Administracyjnaha kodeksaŭ, źviazanyja z parušeńniem zakanadaŭstva ŭ internecie, u tym liku z machlarstvam z dapamohaj hrašovych pieravodaŭ i płastykavych kartak, ekstremizmam, raspaŭsiudžvańniem parnahrafii. A napisać adrasy svaich akaŭntaŭ studenty mahli — dobraachvotna, — kali chacieli, kab kuratary pravieryli, ci niama na ich staronkach zapisaŭ, jakija parušajuć zakon.
Pa słovach dyrektara kaledža, dobraachvotnaść ukazańnia akaŭnta prapisana ŭ pratakole pasiadžeńniaŭ savietaŭ — piedahahičnaha i pa prafiłaktycy. I na heta źviartali ŭvahu kurataraŭ, kali tyja rychtavalisia da kuratarskich hadzin, brali nieabchodnyja materyjały.
— Ale, na žal, situacyja skłałasia takim čynam, što ŭ adnoj z hrup kuratar pracuje nie zusim pravilna i efiektyŭna. Jana pryjšła na kuratarskuju hadzinu niepadrychtavanaj. To bok, nie daniesła patrebnuju infarmacyju da hrupy i paprasiła ŭ ich nie akaŭnty, a łahiny i paroli. Heta pry tym, što hetaja infarmacyja adnosicca da asabistaj, i my nie možam i nie prapanoŭvali padzialicca joj. Kali navučency stali pratestavać suprać usich hetych momantaŭ, kuratar i pačała namiakać na toje, što navučencaŭ adličać, nibyta buduć raźbiracca ŭ hetym pravaachoŭnyja orhany i hetak dalej, — skazaŭ dyrektar, adznačyŭšy, što kuratar — vykładčyk daśviedčanaja, adnak zusim nie raźbirajecca ŭ terminach, źviazanych ź internetam.
Siarhiej Kazłoŭ kaža, što navučency šukali abarony ad dziejańniaŭ kuratara, tamu apublikavali pratakoł u internecie. Dyrektar śćviardžaje, što zaŭsiody kazaŭ studentam źviartacca da jaho pry nieabchodnaści, adnak 7 lutaha z 14.00 da 18.00 jon pravodziŭ saviet pa prafiłaktycy, tamu studenty nie mahli abmierkavać situacyju z kiraŭnikom kaledža.
— Ja siońnia byŭ u hrupie, patłumačyŭ navučencam, što ničoha zahannaha my rabić nie chacieli, a chacieli dapamahčy, i zrabić heta tolki pa ich žadańni. Ja paprasiŭ u chłopcaŭ prabačeńnia za nieefiektyŭnuju pracu maich padnačalenych. A z kurataram my praviali naradu, na jakoj razhledzieli ŭsie pamyłki, jakija jana dapuściła, — patłumačyŭ dyrektar.
Kamientary