Pačynajučy z 2014 hoda biełaruskaja ŭłada «ŭsio čaściej karystajecca rytorykaj nacyjanalistaŭ», jakuju raniej vykarystoŭvała apazicyja, ličać u Instytucie suśvietnaj ekanomiki i mižnarodnych adnosin Akademii navuk Rasii (IMEMA). Taki tezis źmiaščajecca ŭ štohadovym dakładzie instytuta «Rasija i śviet: 2019».
U paćviardžeńnie svajho arhumienta aŭtary dakłada pryvodziać prykład dazvolenaha u 2018 hodzie śviatkavańnia stahodździa BNR.
— Z 2014 hoda ŭłada ŭsio čaściej karystajecca nacyjanalistyčnaj rytorykaj, jakaja vykarystoŭvałasia raniej apazicyjaj.
Pavodle acenki rasijskich navukoŭcaŭ, u 2018 hodzie ŭ Biełarusi «pa sutnaści ŭpieršyniu na aficyjnym uzroŭni atrymała raspaŭsiudžvańnie ideja ab dźviuch krynicach dziaržaŭnaści RB — BNR i BSSR».
— Heta surjozna kantrastuje z papiarednimi krokami pa pabudovie biełaruskaj palityčnaj nacyi, — ličać u IMEMA RAN.
Aŭtary dakłada nahadvajuć, što u 2019 hodzie ŭ Biełarusi adznačajecca stahodździe BSSR, 75-hodździe vyzvaleńnia Minska ad niamieckich zachopnikaŭ i 80 hadoŭ z dnia ŭzbujnieńnia BSSR za košt Zachodniaj Biełarusi ŭ 1939 hodzie.
— Toje, jak buduć rasstaŭlenyja biełaruskimi ŭładami jubilejnyja akcenty, nahladna prademanstruje śpiecyfiku novych palityčnych naratyvaŭ i abrany aficyjnym Minskam palityčny viektar.
Pa acency IMEMA RAN, u Biełarusi taksama jość siły, jakija imknucca da adździaleńnia BPC ad Ruskaj pravasłaŭnaj carkvy, adnak prezident «pakul što ćviorda vystupaje suprać carkoŭnych raskołaŭ».
Vybary mohuć pieranieści, a ŭ parłamient puścić bolš apazicyi
U dakładzie adznačajecca, što 2019 hod u Biełarusi pieradvybarčy, a značyć — «abiacaje być davoli nasyčanym».
— Nielha vyklučać, što pa sacyjalna-ekanamičnych i palityčnych mierkavańniach jany buduć pieraniesieny na vosień 2019 hod.
I choć ad prezidenckich vybaraŭ analityki IMEMA RAN nie čakajuć siensacyj, jany nie vyklučajuć, što apazicyi ŭ biełaruskim parłamiencie moža stać bolš.
— [Heta] dazvolić uładzie demanstravać palityčny pluralizm, jaki raście, svaim zachodnim partnioram i adnačasova z dapamohaj aktyŭnych apazicyjanieraŭ prytarmažvać intehracyjnyja pracesy na rasijskim napramku i łabiravać palityčny razvarot na Zachad.
Minsk budzie «rebałansavać» zamiežnuju palityku
Pa acency aŭtaraŭ dakładu, Maskva budzie praciahvać abumoŭlivać ekanamičnuju dapamohu Biełarusi ŭzmacnieńniem intehracyi. U dakładzie vykazvajecca mierkavańnie, što Łukašenka budzie na roznych padstavach «prytarmažvać» dziejnaść pracoŭnaj hrupy pa intehracyi, «jak užo było ŭ nulavych, kali Minsk patrabavaŭ kampiensacyj za pierachod na rasijskija rubli i nastojvaŭ na stvareńni ŭ siabie druhoha emisijnaha centra».
U zamiežnaj palitycy rasijskija navukoŭcy čakajuć ad Minska praciahu «rebałansavańnia», uzmacnieńnia šmatviektarnaści, uklučajučy raźvićcio adnosinaŭ ź ES. U 2019 hodzie praciahnucca pieramovy pa «Pryjarytetach partniorstva», pieraškodaj na šlachu padpisańnia jakich stała pazicyja Litvy pa BiełAES, ličać u IMEMA.
— Dla Jeŭrasajuza važny ŭdzieł Biełarusi ŭ transhraničnych farmatach uzajemadziejańnia Polšča — Biełaruś — Ukraina, u tym liku u ramkach jeŭrarehijona «Buh», Polšča — Litva — Biełaruś, u tym liku u ramkach jeŭrarehijona «Nioman» i Łatvija — Litva — Biełaruś, u tym liku u ramkach jeŭrarehijona «Aziorny kraj».
Akramia taho, aŭtary dakłada prahnazujuć, što u 2019 hodzie cikavaść ZŠA da Biełarusi ŭzmocnicca.
— Budzie pravodzicca linija na pastupovaje refarmavańnie i zbližeńnie z zachodnimi standartami ekanamičnaha zakanadaŭstva, bolš ciesnaje supracoŭnictva ŭ navukova-adukacyjnaj śfiery. Taksama, imavierna, pašyracca kantakty amierykanskich dypłamataŭ i hramadskich arhanizacyj z apazicyjaj.
Kamientary