Siamji z Hrodzienskaj vobłaści, dzie zasiliłasia šmatdzietnaja maci, biełarusy padaravali meblu i techniku
Siamji ź vioski Vajkuncy Voranaŭskaha rajona, dzie maci paviesiłasia paśla taho, jak orhany apieki zabrali dziaciej, pieradali patrebnyja rečy, piša Radyjo Svaboda.
Taćciana pamierła 7 lutaha, uviečary taho ž dnia, kali ź siamji ŭ prytułak zabrali čaćviarych dziaciej. Dahetul sacyjalnyja słužby nastojvali, kab siamja pierajechała ź viaskovaj chaty ŭ novuju kvateru ŭ Voranavie. Adnak u ich nie było hrošaj, kab nabyć tudy ŭsiu meblu, tamu pierajezd adkładali.
Paśla trahiedyi žurnalisty telekanała «Biełsat» Andruś Kozieł i Volha Čajčyc abvieścili ŭ «fejsbuku» zbor patrebnych rečaŭ dla siamji. Za try dni adhuknułasia kala 50 čałaviek, raskazała Svabodzie piedahoh-psichołah Śviatłana Bierhier, jakaja brała ŭdzieł u dapamozie.
Usie achviaravanyja rečy zavieźli ŭ Voranava i pieradali mužu niabožčycy Taćciany Andreju 20 lutaha. Ludzi pieradali čatyry kanapy, tachtu, šafy, kresły, pralnuju mašynu, televizary, kampjutary, posud, bializnu, ručniki, adzieńnie dla dziaciej, cacki.
Ciaham dnia z dapamohaj znajomych i svajakoŭ Andreja zdoleli razhruzić rečy i rasstavić meblu pa kvatery. Kali siamja pierajedzie ŭ Voranava, haspadarku (karoŭ, śviniej) budzie dahladać baćka Andreja.
Śviatłana Bierhier razam z Andrejem zajechała ŭ prytułak da jahonych dziaciej u Raduni, pahavaryła z dyrektarkaj prytułku Danutaj Savickaj. Pa jejnych nazirańniach jak dziciačaha psichołaha, dzieciam ciapier dastatkova dobra ŭ prytułku. Kiraŭnictva dapamahaje Andreju i inšym baćkam, kab jak maha chutčej viarnuć ich u siamju. Nieŭzabavie ŭsie čaćviora pajeduć u sanatoryj, kab papravić zdaroŭje. Admietna, što ŭsie dzieci z Radunskaha centru paśla viartajucca dachaty, a nie pierachodziać u dziciačy dom.
Pavodle vynikaŭ prakurorskaj pravierki, dla adbirańnia dziaciej u 30-hadovaj šmatdzietnaj maci z Voranaŭskaha rajona byli biassprečnyja zakonnyja padstavy, pakolki dzieci «pražyvali va ŭmovach, jakija ŭjaŭlali realnuju i niepasrednuju pahrozu ich žyćciu i zdaroŭju, z pryčyny čaho pravy i zakonnyja intaresy čaćviarych małaletnich hruba parušalisia».
Prakuratura śćviardžaje, što adsutničaŭ naležny dohlad dziaciej, parušalisia sacyjalnyja normy i praviły, u tym liku praviły hihijeny, što paciahnuła za saboj zachvorvańni dziaciej, a parady miedykaŭ ihnaravalisia. Śćviardžajecca, što nie zadavalnialisia patreby dziaciej u ježy, adzieńni, naležnych umovach pražyvańnia, adpačynku i adukacyi.
Kamientary