«U siarednim kiroŭca aŭtavoza atrymlivaje 130 jeŭra za sutki». Dalnabojščyk ź Viciebska apisaŭ svaju pracu
Viciabčuk Aleh vodzić vialikahruznyja mašyny. Zaraz jon pracuje na aŭtavozie ŭ Jeŭropie, a jašče viadzie błoh u Instagram, dzie pakazvaje svaje pracoŭnyja budni, pobyt i adpačynak. Pra pracu jon raskazaŭ av.by.
Aleh zhadvaje, što niahledziačy na vialiki vopyt pracy na vialikahruzach, na aŭtavozie spačatku davodziłasia zmahacca sa stracham.
«Nie abyšłosia i biez «fakapaŭ» u pieršy čas. Niejak paškodziŭ bampier aŭto padčas pahruzki. Nakolki pamiataju, 600 jeŭra z ułasnaj kišeni tady zapłaciŭ.
Spačatku ŭźnikali taksama vialikija ciažkaści z parkoŭkaj. Standartnaja daŭžynia składzienaha aŭtavoza składaje 18,75 mietra, a z raskładzienym chvastom dachodzić da 21 mietra. Byvajuć taksama aŭtavozy daŭžynioj 22 mietry, ale heta ŭžo niehabaryty, tamu jeździać jany sa śpiecyjalnymi značkami. Dla paraŭnańnia: daŭžynia zvyčajnaj jeŭrafury z pryčepam — 16 mietraŭ. Niamieckija «jołki» (parkinhi) pryznačanyja ŭ asnoŭnym dla standartnych fur, i ź vialikim pryčepam možna nie źmiaścicca na parkovačnym miescy, a kali zajechaŭ, to potym prablema vyjechać, pakul susiedzi z parkoŭki nie źjeduć…»
Mužčyna adznačaje, što ciahačy na aŭtavozach zvyčajna nizkija, bo źvierchu na kazyrok jašče stavicca mašyna. «Adpaviedna, praciahłaje znachodžańnie ŭ kabinie nie takoje kamfortnaje. A nahruzka ŭ kiroŭcy aŭtavoza bolšaja. Naprykład, kali na «tencie» zahruzka zajmaje hadzinu, a maksimum paŭtary, to rasstaŭlać aŭtamabili na ŭstanoŭcy časam i try hadziny davodzicca.
Plus da ŭsiaho tut vielmi vysokaja adkaznaść. Treba maksimalna ŭvažliva prymać hruz, staranna jaho ahladajučy. Dla padstrachoŭki ja zaŭsiody rablu detalovyja fota aŭtamabilaŭ pierad zahruzkaj».
Zarablajuć kiroŭcy aŭtavozaŭ, jak praviła, bolš, čym usie astatnija dalnabojščyki.
«Raniej my atrymlivali ŭ dva razy bolš za inšych! Adnak apošnim časam (nie viedaju, z čym heta źviazana) na «tentach» i «chaładzilnikach» zarpłatu padymajuć, a ŭ nas jana staić na miescy.
Ja aformleny ŭ litoŭskaj firmie. Tut kiroŭcy aŭtavozaŭ atrymlivajuć u siarednim 130 jeŭra za sutki. Na standartnych furach ludziam płaciać zaraz 95—100 jeŭra. Roźnica va ŭzroŭni zarabotnaj płaty pa-raniejšamu jość, ale jana ŭžo nie takaja istotnaja…»
Aleh raskazvaje, na jakich ciahačach jeździŭ.
«Ja ŭžo, napeŭna, na ŭsich, akramia Renault, pajeździŭ. Maju na ŭvazie jeŭrapiejskija brendy. Kitajskich ciahačoŭ u ES nie sustrenieš, «amierykancy» taksama redkija hości na tutejšych darohach. Ja jeździŭ na Volvo, MAN, DAF, Mercedes, a zaraz pracuju na Scania. Hety ciahač ličycca najbolš zručnym dla aŭtavoza. Ale mnie ź vialikich mašyn usio ž taki bolš padabajecca Mercedes: jon kamfortny, miakki, usio ŭ im pradumana da drobiaziaŭ».
Mužčyna jeździŭ u asnoŭnym pa Zachodniaj, Paŭdniovaj i Centralnaj Jeŭropie: Francyja, Hiermanija, Bielhija, Ispanija, Italija, Čechija, Słavakija…
Adznačaje, što ŭ Polščy kantrolnyja orhany lubiać praviarać dalnabojščykaŭ. «U asnoŭnym kantralujuć zachavańnie režymu pracy i adpačynku, ale časam praviarajuć taksama daŭžyniu i vyšyniu aŭtaciahnika, macavańni aŭtavoza, tarmazy… U vypadku vyjaŭleńnia parušeńniaŭ vypisvajuć štrafy. Suma ich — ad sta jeŭra ŭ zaležnaści ad parušeńnia».
Hrafik Aleha taki: vosiem tydniaŭ pracuje, čatyry — doma. Ale hrafik płavajučy, pa žadańni jaho možna mianiać.
«Płanuju ŭ niedalokaj budučyni mianiać pracu. Jak by tam ni było, a minusaŭ u majoj prafiesii kudy bolš, čym plusaŭ. Ale hałoŭnaj pryčynaj syści źjaŭlajecca toje, što mnie chočacca być doma ź siamjoj. Vielmi lublu svaju žonku i chaču być zaŭsiody pobač ź joj. Tak što budu šukać varyjanty, jak heta zrabić!»
Kamientary