Nacbank daŭ kamiercyjnym bankam ukazańnie

Nacyjanalny bank Biełarusi daŭ kamiercyjnym bankam ukazańnie zabiaśpiečvać abmiennyja punkty valutaj na praciahu ŭsiaho handlovaha dnia. Pra heta paviedamiŭ BiełaPAN pres‑sakratar hałoŭnaha banka krainy Michaił Žuravovič.

«Nacyjanalny bank hatovy pradavać bankam valutu ŭ nieabchodnym abjomie, i bankam navat dadziena ŭkazańnie, kab ad adkryćcia da zakryćcia abmiennaha punkta ŭ im była valuta»,

U Nacbanku ŭpeŭnieny, što

valuta ŭ bankach jość i jaje ciapierašni deficyt u abmiennych punktach abumoŭleny «techničnymi pryčynami».

Ciapierašni niedachop invaluty ŭ abmiennych punktach, pavodle słoŭ M.Žuravoviča, tłumačycca pierš za ŭsio niehatoŭnaściu bankaŭ da pracy ŭ najaŭnaj situacyi. «Banki nie čakali, što paśla źnižeńnia kursu valuta budzie tak aktyŭna skuplacca nasielnictvam», — skazaŭ pres‑sakratar Nacbanka.

***

Pavodle źviestak karespandenta BiełaPAN, jaki z 11 da 12 hadzin 9 studzienia naviedaŭ šerah abmiennych punktaŭ u centry Minska, najaŭnaja valuta pa‑raniejšamu ŭ deficycie.

U abmiennym punkcie filijała №527 «Biełarusbanka» ŭ padziemnym pierachodzie kala Nacyjanalnaha banka byli tolki rasijskija rubli. Pavodle słoŭ kasira, valutu zavoziać adzin raz u dzień ranicaj.

U abmiennym punkcie №13 minskaj haradskoj dyrekcyi «Bielinviestbanka» ŭ HUMie ŭ najaŭnaści byli niekalki socień jeŭra, dalary adsutničali.

Tam ža ŭ abmiennym punkcie №10 filijała № 510 «Biełarusbanka» svabodna pradavalisia 100‑dalaravyja kupiury. U čarzie było 11 čałaviek, jakija kuplali pa 100—200 dalaraŭ.

U punkcie abmienu valuty №16 Minskaha tranzitnaha banka kala HUMa kasir śćviardžalna adkazała na pytańnie karespandenta BiełaPAN, ci moža jon kupić 1.000 dalaraŭ i 1.000 jeŭra, adnak zaznačyła, što «ciapier jość, potym moža nie być».

U filijale №520/300 «Biełarusbanka» (pr. Niezaležnaści, 44) žančyna svabodna kupiła 10.000 rasijskich rubloŭ, dalaraŭ i jeŭra nie było.

U abmiennym punkcie №2 minskaha adździaleńnia № 1 «Biełźniešekanambanka» z pravaha boku CUMa visieła tablička «Dalaraŭ niama». U 11.50 kasir admoviłasia pradać žančynie 5 dalaraŭ, jakija pierad hetym abmianiaŭ na biełaruskija rubli mužčyna. Supracoŭnica banka zajaviła, što joj patrebny hrošy na zdaču, i prapanavała žančynie, jakaja źbirałasia kupić 50 dalaraŭ, pačakać, pakul chto‑niebudź pradaść valutu.

U abmiennym punkcie №61 «Technabanka» ź levaha boku CUMa byli jeŭra i bujnyja kupiury ŭ dalarach.

U abmiennym punkcie №1 filijała №529 «Biełarusbanka» na trecim paviersie CUMa ŭ najaŭnaści było tolki 4.660 rasijskich rubloŭ.

U samym filijale №529 (pr. Niezaležnaści, 56) u 12.02 małady čałaviek kupiŭ apošnija 100 dalaraŭ.

Kurs kupli najaŭnaha dalara ŭ hetych punktach skłaŭ 2.640—2.680 rubloŭ, prodažu — 2.698.

BiełaPAN

• 0
• 0
• 0
• 0
• 0
• 0
• 0
• 0