Akademik Piatro Viciaź raspavioŭ Svabodzie, što kiraŭnictva Nacyjanalnaj akademii navuk Biełarusi ciapier viadzie pieramovy ź Mienskim harvykankamam ab vydzialeńni miesca dla muzeju kasmanaŭtyki, piša «Radyjo Svaboda».
«My pierakonvajem haradzkija ŭłady ŭ tym, što ŭ stalicy našaj krainy pavinien być taki muzej. Kali ŭ Miensku chočuć bačyć bolej turystaŭ, asabliva zamiežnych, to jon prosta nieabchodny. Ciapier prapracoŭvajucca roznyja varyjanty miesca dla muzeju. My źbirajem dla jaho ekspanaty, cikavyja dakumenty. Heta nieabchodna rabić, bo z kožnym hodam, na žal, častka ź ich hublajecca», — skazaŭ Piotar Viciaź.
Na pytańnie Svabody, ci budzie ŭ hetym muzei miesca dla słavutaha biełarusa, akademika Mižnarodnaj akademii astranaŭtyki Barysa Kita, jakomu ŭ 2020 hodzie spoŭniłasia b 110 hadoŭ, Viciaź adkazaŭ stanoŭča:
«Biezumoŭna. Heta ž adzin z zasnavalnikaŭ kaśmičnaj navuki. Jahony ŭniosak u raźvićcio našaj navuki vielmi vialiki. My jaho pamiatajem. Vinšavali sa 100-hodździem, kali jon byŭ jašče žyvy. Na žal, u nastupnym hodzie ŭžo pavinšavać nie daviadziecca. Barys Kit pražyŭ vialikaje i składanaje žyćcio. Byli ŭ im i momanty, jakija nia ŭsie razumiejuć. Ale i čas byŭ niaprosty. A navukoviec jon vydatny».
Aśvietnik i navukoviec Barys Kit pamior 1 lutaha na 108-m hodzie žyćcia ŭ Frankfurcie-na-Majnie.
Barys Kit naradziŭsia ŭ 1910 hodzie ŭ Sankt-Pieciarburhu. Bačyŭ Lutaŭskuju revalucyju. Paśla kastryčnickaha pieravarotu jahony baćka, ratujučysia, pieravioz siamju ŭ viosku Aharodniki Karelickaha rajonu. Skončyŭ Vilenski ŭniversytet imia Stefana Batoryja, vykładaŭ matematyku i byŭ dyrektaram Vilenskaj biełaruskaj himnazii, paźniej Navahradzkaj himnazii. Za biełaruskuju dziejnaść pieraśledavaŭsia ŭładami Polščy, SSSR, nacysckaj Niamieččyny.
U 38 hadoŭ emihravaŭ u ZŠA. Pracavaŭ u roznych kampanijach, udzielničaŭ u amerykanskich prajektach padrychtoŭki da palotaŭ u kosmas, daśledavaŭ kaśmičnyja prahramy SSSR. Prafesar, doktar matematyki, akademik Mižnarodnaj akademii astranaŭtyki, siabra mnohich inšych mižnarodnych i nacyjanalnych akademij i abjadnańniaŭ.
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
Kamientary