Zaviaršajecca čarhovy etap rekanstrukcyi Varvarynskaj carkvy ŭ Pinsku. Niekalki hadoŭ tamu tut byli zamienieny vokny i praviedzieny vonkavyja azdablenčyja raboty. Kupał i niekatoryja elemienty dachu pierafarbavali ź siniaha ŭ karyčnievy koler. Na hetym tydni na chramie zamianili kupał, zastałosia ŭstalavać na jaho novy kryž, pieradaje «Miedyja-Paleśsie».
Śviata-Varvarynskaja carkva samaja staražytnaja ŭ Pinsku. U savieckija časy heta byŭ naohuł adziny pravasłaŭny chram u stalicy Paleśsia.
Pieršapačatkova heta byŭ kaścioł biernardyncaŭ. U 1705 hodzie vialiki hietman litoŭski kniaź Michaił Višniaviecki razam z žonkaj Kaciarynaj zasnavali ŭ Pinsku katalicki klaštar ksiandzoŭ-biernardyncaŭ. U 1717 hodzie draŭlany kompleks manastyra byŭ pabudavany, u jaho ŭvachodziŭ i kaścioł Śviatoha Michaiła Archanhieła.
U 1770 hodzie na miescy draŭlanaha kaścioła pačałosia budaŭnictva kamiennaha. Jon byŭ pabudavany ŭ styli poźniaha baroka, jaho aśviacili ŭ 1778 hodzie. Jašče niadaŭna carkva vyhladała tak.
Paśla paŭstańnia 1830—1831 hadoŭ budynak kaścioła pieradali pravasłaŭnaj carkvie. Jaho pierabudavali, vysoki krokvienny dach, pakryty dachoŭkaj, zrabili bolš pakatym, a ŭ centry kańka byŭ uźviedzieny baraban z «cybulnym» kupałam.
Kamientary