Pa prablemnych pradpryjemstvach nieabchodna raspracavać stratehii raźvićcia, vyznačyć vyraznyja pierśpiektyvy. Takuju zadaču pastaviła siońnia kiraŭnik administracyi prezidenta Natalla Kačanava na pasiadžeńni Homielskaha harvykankama, paviedamlaje BiełTA.
Taksama Kačanava naviedała niekalki haradskich abjektaŭ. Tak, na zavodzie vymiaralnych pryboraŭ jana raskrytykavała pracu kiraŭnictva pradpryjemstva, a taksama miascovych orhanaŭ ułady i Minprama. Pa vynikach pracy I kvartała zavod prademanstravaŭ rentabielnaść u minus 2%, na składach vialikija zapasy hatovaj pradukcyi, vytvorčyja płoščy ŭ niezdavalniajučym stanie. Niehatyŭnaja acenka była dadziena i vykanańniu techniki biaśpieki, i sanitarnamu stanu pamiaškańniaŭ. Natalla Kačanava ŭ cechach, u kabinietach pahutaryła z rabotnikami zavoda. Kiraŭnik administracyi prezidenta krytyčna vykazałasia pra ŭmovy, u jakich pracujuć ludzi. «Takoha być nie pavinna!» — padkreśliła jana. Narakańni vyklikała i toje, što na infarmacyjnych stendach raźmieščany daŭnija, časam užo vyćviłyja materyjały.
Kiraŭnictvu zavoda akreśleny samyja karotkija terminy dla likvidacyi niedachopaŭ. «Heta biezhaspadarčaść poŭnaja. Naviadzicie nieadkładna paradak», — zapatrabavała Natalla Kačanava. Jana źviarnuła ŭvahu kiraŭnictva na toje, što elemientarnaja ŭborka terytoryi, u cechach nie patrabuje vialikich finansavych vydatkaŭ, zrabić heta možna, naprykład, kalektyŭna padčas subotnika.
Kamientary