Muftyj Šabanovič: Pra miačeć u honar Kadyrava ŭ Breście jašče rana kazać

Raniej u interviju «Čiečnia siehodnia» Abu-Biekir Šabanovič skazaŭ, što «iduć pieramovy pamiž administracyjami našych prezydentaŭ» i što musulmanie Biełarusi prosiać dapamohi ŭ budaŭnictvie miačeci ŭ Bieraści, dzie «žyvie mnoha bratoŭ i siaścior z Čačni».

«My čakajem dapamohi ŭ budaŭnictvie miačeci ŭ Bieraści, i my hatovyja pryśviacić taki abjekt bratam, hierojam Rasiei, ci Achmatu, ci Ramzanu Kadyravu, jany zasłuhoŭvajuć hetaha», — zajaviŭ vydańniu Abu-Biekir Šabanovič.

Karespandentu Svabody mufcij paviedamiŭ, što rašeńnie pra ŭźviadzieńnie miačeci ŭ Bieraści jašče nie pryniataje. Jon ćvierdzić, što nikoli nie kazaŭ, što ŭ Bieraści źbirajucca pabudavać miačeć imia Ramzana Kadyrava, jak pišuć u internecie.

«Dziakuj bohu, kali heta spraŭdzicca, ale ž pakul takoj damoŭlenaści z kiraŭnictvam Čačni nie było. Pra heta jašče rana havaryć, bo ja nia maju hrošaj. Heta pakul pošuki».

Abu-Biekir Šabanovič skazaŭ, što miačeć u Bieraści patrebnaja, bo ludzi tam pravodziać piatničnuju malitvu na vulicy.

«My šukajem investaraŭ, tych, chto dapamoža nam vyrašyć hetaje składanaje pytańnie. Heta budzie imia Kadyravych, šejchaŭ, ci Arabskich Emirataŭ, ci Saudaŭskaj Arabii, — kazać rana. My jašče šukajem, chto moža dapamahčy pabudavać, kab ludzi nie na vulicy, nie pa dvarach malilisia ŭ piatnicu, kali treba vykonvać abaviazkovuju kalektyŭnuju malitvu», — skazaŭ mufcij.

Abu-Biekir Šabanovič sustrakaŭsia z daradcam Ramzana Kadyrava, mufcijem Čačni Sałach-Chadžy Miežyjevym — abmiarkoŭvaŭ plany supracoŭnictva.

«Ja jašče šukaju dapamohi, kab zrabić memaryjalny kompleks na našym byłym mizary (musulmanskich mohiłkach) u Miensku, pastavić tam pomniki.

I niama pytańnia, «što vam patrebna?» A vypłyła pytańnie, jak niešta smažanaje-smalenaje, «miačeć imia Kadyrava»».

Abu-Biekir Šabanovič adznačyŭ, što ŭ Biełarusi 25 musulmanskich hramadaŭ i tolki 12 malitoŭnych damoŭ i miačeciaŭ.

«Niekatoryja nijakaha kutočku nia majuć. Ja pavinien šukać i prasić, kab choć niejki nievialički malitoŭny dom zrabić. Voś heta vialikaja prablema.

My sami nia možam heta adoleć. Mienskuju sabornuju miačeć budavali ciaham 12 hadoŭ. Za svaje hrošy nie zmahli pabudavać, ja taksama jeździŭ pa śviecie, stajaŭ na kaleniach i prasiŭ dapamohi, kab dabudavać sabornuju miačeć. Dziakuj bohu, što adhuknulisia braty pa mazhabu (tak nazyvajucca ŭ isłamie bahasłoŭska-pravavyja kirunki) i dapamahli dabudavać».

Mnoha čačencaŭ, jakija apynulisia ŭ Bieraści, śćviardžali, što ŭciakali z Čačni ad režymu Ramzana Kadyrava. Biełaruski pravaabaronca kazaŭ Svabodzie, što jamu davodziłasia čuć ad uciekačoŭ papiaredžańni, što ŭ Bieraści prysutničajuć ahienty Kadyrava.

• 0
• 0
• 0
• 0
• 0
• 0
• 0
• 0