«Muzykanty-mužčyny majuć značna bolšyja rascenki i bolš uvahi z boku bujnych miedyja, čym žančyny»
Willibald — šviejcarski rok-hurt. Jaho ŭdzielnicy ŭvachodziać u asacyjacyju Helvetiarockt, jakaja zmahajecca za pavyšeńnie reprezientatyŭnaści žančyn u muzyčnaj industryi krainy i vystupaje suprać stereatypaŭ. U niadzielu hurt vystupaŭ u Minsku na pieršym haradskim sacyjalnym fiestyvali IBB JubiläumsFest. «Naša Nina» raspytała muzykaŭ pra seksizm na rok-scenie i zaležnaść zarobkaŭ ad połu.
«Važna, kab u muzyku prychodziła bolš žančyn. Rok-hurt, u jakim bolšaść — dziaŭčaty, nie pavinien usprymacca jak niešta dziŭnaje», — ličyć salistka Debara.
Z tym, što ad ich benda čakajuć krychu inšaj muzyki, jany sutykajucca pastajanna. «Kali nas čujuć na saŭndčeku, ździŭlajucca, što my takija hučnyja, rezkija. Kali ŭ hurcie jość žančyny, dumajuć, my pavinny być bolš cichimi, mieładyčnymi i miłymi», — kaža hitaryst Čarli, adziny mužčyna ŭ hurcie.
Dziaŭčaty ŭspaminajuć vypadki seksizmu na scenie. Časam, kali jany pryjazdžajuć na rok-fiestyval, arhanizatary nie vierać, što jany ŭdzielnicy hurtu i adpraŭlajuć na bekstejdž. Ci pačynajuć tłumačyć, jak karystacca technikaj, byccam muzykantki nie razumiejuć, jak jana pracuje.
«Naša bubnačka — žančyna. Kožny raz kali my pryjazdžajem vystupać, nichto nie čakaje, što na barabanach budzie jana. Jany dumajuć, što bubnač — Čarli, — dzielicca hitarystka Naomi. — A paśla kancerta da jaje padychodziać i kažuć: ty sapraŭdy krutaja. Jany ździŭleny, što žančyna dobra hraje. I heta tak nienarmalna, bo majsterstva nie zaležyć ad połu».
Inšy stereatyp: žančyny na scenie zaŭsiody musiać być pryhožymi.
«My pavinny dobra vyhladać na fota, u ruchu. I heta nie toje samaje, što čakajuć ad mužčyn. Kali ty mužčyna i robiš mocny tvar padčas śpievu, heta całkam narmalna, ale kali ty žančyna, heta ličać brydkim. Tamu ty pastajanna trymaješ u hałavie, jak tabie treba ruchacca, jak treba vyhladać», — kaža Naomi.
A voś stereatyp pra toje, što žančyny traplajuć u šou-biznes praz łožak, užo nieaktualny. Sprava ŭ tym, što z raźvićciom internetu vialikija łejbły bolš nie vyrašajuć, jakoj budzie muzyka, u ich ciapier mienš ułady.
Zhodna sa śpisam Forbes, letaś samy vysokaapłatny śpiavak zarabiŭ na 30 miljon dalaraŭ bolš, čym śpiavačka. Atrymlivajecca, zarobki ŭ mužčyn-muzykantaŭ bolšyja?
«Składana skazać, bo my nie zarablajem hrošy muzykaj. Kaniečnie, my atrymlivajem hanarary, ale heta maleńkija sumy, bo my pradstaŭlajem alternatyŭnuju muzyku. Ale kali pahladzieć na mejnstrym-kirunak, muzykanty-mužčyny majuć značna bolšyja rascenki i bolš uvahi z boku bujnych miedyja, — adznačaje Debara. —
Čamu? Mahčyma, vy jak žurnalist z hetym taksama sutykajeciesia: ludzi bolš daviarajuć mužčynam, bačać u ich ekśpiertaŭ. Heta psichałahičnaja štuka.
U Šviejcaryi ahułam my majem razryŭ u apłacie pracy mužčyn i žančyn kala 20%. Tak, častkova heta tamu, što žančyn abirajuć mienš apłatnyja raboty, ale ŭ 6% vypadkach razryŭ niemahčyma abhruntavać. Hetyja 6% my možaš patłumačyć tolki seksizmam».
«NN»: Pravakacyjnaje pytańnie: moža, mužčyny bolš talenavityja?
— Vidać, ludzi ŭ heta vierać, — uśmichajecca Naomi. — Ale, kaniečnie, heta nie tak. Mahčyma, mužčyny bolš zaachvočvajucca ŭ hramadstvie.
— Mužčyny mohuć dumać, što jany bolš talenavityja, bo im čaściej kažuć pra heta, — dadaje Majkł.
— Muzykanty-mužčyny bolš aktyŭnyja, lepš siabie prasoŭvajuć. A žančyny časam niaŭpeŭnienyja ŭ sabie i čakajuć, kab ich adkryli, kab chtości skazaŭ, što jany dobryja, — padsumoŭvaje Debara.
Kamientary