U Biełarusi chočuć dazvolić palavańnie na łasioŭ i aleniaŭ u zonie adčužeńnia ČAES
Kiraŭnictva Paleskaha radyjacyjna-ekałahičnaha zapaviednika, arhanizavanaha na biełaruskaj častcy ziamiel, zabrudžanych paśla avaryi na Čarnobylskaj AES, razhladaje mahčymaść arhanizacyi na svajoj terytoryi palavańnia na łasioŭ i aleniaŭ, paviedamiŭ žurnalistam dyrektar zapaviednika Michaił Rubaščanka.
«My zajmajemsia padrychtoŭčaj pracaj, afarmleńniem dakumientaŭ, padrychtoŭkaj bijaekanamičnaha abhruntavańnia», — zajaviŭ Rubaščanka.
Pavodle jaho słoŭ, zapaviednik choča arhanizavać na svajoj terytoryi trafiejnaje palavańnie, kali palaŭničyja płaciać vialikija hrošy za mahčymaść źniščyć peŭnuju žyviołu, naprykład bujnoha i darosłaha samca. Prybytki ad licenzij na takoje palavańnie zvyčajna traciacca na ŭznaŭleńnie papulacyj žyvioł.
«Jość vid dziejnaści jak trafiejnaje palavańnie. Nie ŭsie vidy palavańnia, a trafiejnaje. Heta palavańnie, pry jakim adbirajucca samyja darosłyja, vysokija pa svaich jakaściach samcy. Trafiejnaje palavańnie alenia i łasia cenicca pa kolkaści adrostkaŭ na rohach i vazie rohaŭ», — patłumačyŭ Rubaščanka žurnalistam.
Pavodle jaho słoŭ, ciapier na terytoryi zapaviednika žyvuć kala 2 tysiač łasioŭ, krychu bolš za 2 tysiač vysakarodnych aleniaŭ, a taksama kazuli. Zaraz zapaviednik rychtuje dakumientacyju na dazvoł takoha palavańnia, na dumku dyrektara, dakumientacyja moža być hatovaja ŭžo ŭ kancy hetaha hoda.
Pa słovach dyrektara, miarkujecca, što paśla zaviaršeńnia palavańnia tušy žyvioł buduć prachodzić dazimietryčny kantrol, paśla jakoha budzie jasna, ci možna ŭžyvać ich u ježu.
«U pryncypie jany pavinny zabirać i tušu, i rohi, ale nichto im nie addaść, kali źvier budzie pieravyšać dapuščalnyja normy», — rastłumačyŭ Rubaščanka.
Paleski dziaržaŭny radyjacyjna-ekałahičny zapaviednik byŭ arhanizavany ŭ 1988 hodzie ŭ biełaruskaj častcy zony adčužeńnia Čarnobylskaj AES na terytoryi troch najbolš paciarpiełych ad avaryi rajonaŭ Homielskaj vobłaści. Płošča zapaviednika — 216 tysiač hiektaraŭ, na jaho terytoryi znachodzicca kala 100 evakujavanych viosak, dzie da avaryi žyło zvyš 20 tysiač čałaviek.
Zaraz u zapaviedniku dazvoleny arhanizavany turyzm — hości mohuć nie tolki paznajomicca z pracaj vučonych, ale i panazirać za dzikaj pryrodaj, u tym liku za mnohimi vidami ptušak. Uzimku turysty mohuć ubačyć zubroŭ, jakija vychodziać da karmušak.
Kamientary