Doktar Vituška pahladzieŭ rasijskija sieryjały pra daktaroŭ. I jamu stała śmiešna

«Natrapiŭ na sieryjał pa miedycynie pa BT-1, ź liku rasijskich małabiudžetnych sieryjalčykaŭ z akciorami druhoha ešałona, źniatych u Biełarusi ci va Ukrainie. Pahladzieŭ chvilin 10. Pieraklučyŭ. Praź niekalki hadzin patrapiŭ na jašče adzin sieryjał, tam taksama zakranałasia lačeńnie ludziej. Hetym razam chapiła 5 chvilin, — piša ŭ siabie ŭ fejsbuku viadomy dziciačy doktar Andrej Vituška. —

Z ubačanaha:

Hruntoŭna ciažarnaja hierainia traplaje ŭ špital ź pierałomam ruki. Doktar u kadry raspaviadaje: «Nužna opieracija po sopostavleniju otłomkov, no v vašiem połožienii aniestiezija protivopokazana, poetomu nado potierpieť — ja postarajuś sdiełať vsio bystro». Reč u tym, što aniestezija nie tolki mahčymaja (jość peŭnyja preparaty i mietady), ale i pažadanaja, kab nie traŭmavać dadatkova maci i płod, jakija i tak u stresie.

Hladzim dalej. Paśla takoj «apieracyi» biez narkozu ŭ damy adyšli kalapłodnyja vody i pačalisia rody. Pryhožyja ludzi ŭ biełych chałatach vyrašajuć prymać ich tam, dzie lačyli pierałom, tamu što «vody otošli — pierievodiť v roddom užie pozdno». Mnohija z maich čytačak viedajuć na ŭłasnym dośviedzie, što ad momantu, kali adyšli vody, da naradžeńnia dziciaci prachodziać hadziny. Ok, byvajuć situacyi, kali vody adychodziać niepasredna pierad rodami, ale, kab mierkavać pra heta peŭna, treba ahledzieć pacyjentku. Ekrannyja ž «kalehi» zajavili pra heta adrazu, jak tolki dama paviedamiła im pra padciakańnie vod. U vyniku rody prymajucca ŭ traŭmatałohii traŭmatołahami.

Aŭtary filma, vierahodna, nahladzielisia amierykanskich sieryjałaŭ pra lekaraŭ Emergency Medicine, jakija i ranu zašyjuć, i pierałom supastaviać, i rody prymuć. Ale takich niama ŭ vialikich haradach postsavieckaj prastory, dzie adbyvajecca dziejańnie filma.

Inšaja hierainia daviedałasia, što ciažarnaja paśla saraka, i spytała, ci nie pozna zrabić abort — 15 tydniaŭ. «Miedrabotniki» z ekranu spačuvalna zakacili vočy. Stvaralnikam kino nichto nie raspavioŭ, što pieraryvańnie ciažarnaści pa žadańni žančyny mahčymaje tolki da 12 tydniaŭ. Dalej — tolki pa śpiecyjalnych pakazańniach.

Nu i višańka na torcie z druhoha filma. Dziaŭčynka z chvarobaj chrybietnika straciła mahčymaść chadzić. Dapamahaje joj asteapat, pryčym nie prosta, a prafiesar asteapatyi. Asteapatyja na postsavieckaj prastory — zusim nie toje, što ŭ ZŠA, mnohija jaje krytykujuć jak iłženavuku. Ale navat kali dapuścić, što heta nie tak, to ŭ namienkłaturu lekarskich śpiecyjalnaściaŭ hety profil uniesieny ŭ Rasii tolki 4 hady tamu. Aśpirantury pa asteapatyi, kab tam stać doktaram navuk, niama ŭ pryrodzie.

Taksama jaki ŭžo raz sutykajusia z tym, što ruskamoŭnyja sieryjały, dzie zakranajecca miedycyna, majuć važnaj fonavaj prablemaj — dzie ŭziać hrošy na lačeńnie. Byccam by inakš nie byvaje.

Karaciej, nie hladzicie rasijskija sieryjały pra miedycynu. Ludzi, jakija škadujuć hrošaj na kansultantaŭ, nie vartyja vašaj uvahi. I nie čytajcie pierad snom savieckich haziet», — nahadvaje doktar Vituška.

• 0
• 0
• 0
• 0
• 0
• 0
• 0
• 0