Biełaruskich klijentaŭ nie prymajem

Niekatoryja amerykanskija pravajdery zablakavali sajty, stvoranyja ź Biełarusi, pierastrachoŭvajučysia pry vykanańni nakładzienych na našu krainu sankcyj.

Pravajder admoviŭ u pasłuhach sajtu Bielar.us, stvoranamu pry Biełaruska-Amierykanskim Zadzinočańni praŭnikam-biełarusam Jarasłavam Kryvym, jaki pracuje ŭ ZŠA. Sajt byŭ pryśviečany amerykanska‑biełaruskim spravam i nia mieŭ anijakaha dačynieńnia da biełaruskaha ŭradu. Voś jak apisvaje sytuacyju na sajcie bielar.us sam Jarasłaŭ.

U minułuju piatnicu Bluehost, naš hostynhavy pravajder zablakavaŭ sajt. Bluehost paabiacaŭ vydalić naš błoh ciaham 10 dzion. Sajt byŭ blakavany čatyry dni, pakul my nie zaviaršyli mihracyju na novy hostynh siońnia.

Lišnie i kazać, što ja byŭ nadta ździŭleny, kali daviedaŭsia pra blakadu. Na Bielar.us nie było ničoha, što navat addalena možna ličyć niezakonnym. Tamu spačatku ja mierkavaŭ hety prosta pamyłka. Ale heta było nia tak. Voś historyja, jakaja možna było čakać, što jana zdarycca na Kubie ci ŭ Paŭnočnaj Karei, ale nie ŭ ZŠA.

Kali ja patelefanavaŭ u kampaniju pa tłumačeńni, pradstaŭnik Bluehost skazaŭ mnie, što ja «złoŭžyvaŭ» ich umovami nadańnia pasłuhaŭ, bo ja znachodziŭsia ŭ Biełarusi, kali ja stvaryŭ svoj rachunak u ich kampanii. Jak ja zrazumieŭ, jany vyličyli heta, adsačyŭšy maju IP‑adras.

Pavodle Bluehost, Biełaruś – «kraina, na jakuju nakładzienyja sankcyi» (Sanctioned Country), i mienavita tamu ja nia moh być ich klijentam. Jany patłumačyli, što paśla kansultacyjaŭ z Upravaj ZŠA pa kantroli za inšaziemnymi aktyvami (U.S. Office of Foreign Assets Control) było vyrašana zabaranić usim ludziam ź Biełarusi karystacca lubymi pasłuhami kampanii. Pradstaŭnik Bluehost patłumačyŭ, što im było šmat praściej zabaranić heta ŭsim, čym sprabavać vyśvietlić, chto jość chto.

U vyniku, chacia ja žyvu i pracuju ŭ ZŠA, płaciŭ za ich pasłuhi svajoj amerykanskaj kredytoŭkaj, jany zablakavali ŭeb‑sajt i paabiacali vydalić usio na praciahu dziesiaci dzion. Pierad tym jak začyniać Bielar.us i moj asabisty sajt, jany nie dasyłali žadnaha papiaredžańnia. Jany patłumačyli, što navat kali b ja byŭ stvaryŭšy moj rachunak na Bluehost z terytoryi ZŠA, mnie ŭsio adno zabaranili b karystacca ich pasłuhami. Prosta tamu, što ja hramadzianin Biełarusi.

Jak specyjalist‑praktyk u halinie mižnarodnaha prava, ja viedaju, što sfera dziejańniaŭ sankcyjaŭ suprać Biełarusi vielmi vuzkaja. Sankcyi majuć dziejničać tolki ŭ dźviuch sytuacyjach:

a) suprać niekatorych ludziej, što «padryvajuć demakratyčnyja pracesy albo instytucyi ŭ Biełarusi» i čyje imiony pieraličanyja na ŭeb‑sajcie Kaznačejstva ZŠA; a taksama

b) suprać «kantralavanych Łukašenkam naftachimičnych kanhlamerataŭ», jak patłumačana Kaznačejstvam ZŠA.

Ale interpretacyja Bluehost‑a była zusim nia vuzkaj. Zhodna artykułu 13‑mu ich umovaŭ nadańnia pasłuhaŭ:

1. Kožnaj krainie, na jakuju nakładzienyja sankcyi, usim uradavym, kamercyjnym ci inšym adzinkam, raźmieščanym u takoj krainie, i ŭsim asobam, što znachodziacca ŭ luboj z krainaŭ, na jakija nakładzienyja sankcyi, hetym zabaraniajecca rehistravacca albo zalahińvacca na BlueHost.Com, padpisvacca na lubyja pasłuhi albo karystacca lubymi pasłuhami BlueHost.Com.

2. Lubomu čałavieku, jaki źjaŭlajecca rezydentam ci hramadzianinam krainy, na jakuju nakładzienyja sankcyi, hetym zabaraniajecca rehistravacca albo załahińvacca na BlueHost.Com, padpisvacca na lubyja pasłuhi albo karystacca lubymi pasłuhami BlueHost.Com, niezaležna ad taho, dzie znachodzicca hety čałaviek.

U katehoryju «kraina, na jakuju nakładzienyja sankcyi», uklučanyja Biełaruś, a taksama Iran, Zymbabve i inšyja aŭtakratyčnyja režymy. Niesumnienna, što artykuł 13‑y nakiravany na dyskryminacyjnaje abychodžańnie z rezydentami hetych krainaŭ.

Jak heta ni śmiešna, ale błoh, zablakavany Bluehost‑am, stvarajuć aktyvisty Biełaruska‑Amerykanskaha Zadzinočańnia – adnoj z najstarejšych biełaruskich prademakratyčnych hrupaŭ u ZŠA. Jaho vašynhtonskaje pradstaŭnictva čaściakom hraje vyrašalnuju rolu, spryjajučy kštałtavańniu palityki ZŠA ŭ dačynieńni da Biełarusi.

Na našym błohu źmieščana niekalki pastoŭ, pryśviečanych tamu, jak zamiežnaja palityka ZŠA pavinna dapamahčy ŭ prasoŭvańni pravoŭ čałavieka, svabody słova i pravaparadku ŭ Biełarusi. Darečy adnoj z metaŭ Aktu ab demakratyi ŭ Biełarusi, pryniataha Kanhresam u 2006 hodzie było «sadziejničańnie raźvićciu niezaležnych ... internet‑medyjaŭ, jakija pracujuć ... ź miescaŭ, raźmieščanych pa‑za miežami krainy».

...

Z hetaj historyi jość dźvie prostyja, ale važnyja navuki:

Praktyčnaja navuka palahaje ŭ tym, što treba trymacca dalej ad Bluehost. ...

U palityčnym sensie zaznačym, što amerykanskija ahiencyi, adkaznyja za ažyćciaŭleńnie sankcyjaŭ pavinny chutčej pieraduchilać, čym uchvalać takija zachady.

* * *

Jak zaznačaje taksama Jarasłaŭ Kryvoj, ź im źviazvalisia inšyja biełarusy, taksama vykinutyja z Bluehost‑a praz svaju dziaržaŭnuju prynaležnaść. Jon taksama piša, «prablema bolšaja čym ja napačatku dumaŭ. Usie biełaruskija profili byli vydalenyja ŭ 2007 hodzie administracyjaj Guru.com – papularnaha sajtu dla frylanseraŭ. Jany bolš nie prymajuć biełaruskich klijentaŭ. Ich matyvacyja takaja samaja – zašyrokaja interpretacyja sankcyjaŭ.... U 2008 hodzie iKobo.com (apracoŭščyk onlajnavych płaciažoŭ) taksama paprasiŭ usich biełaruski' klijentaŭ syści ciaham piaci dzion, abapirajučysia na svaju interpretacyju sankcyjaŭ.

• 0
• 0
• 0
• 0
• 0
• 0
• 0
• 0