Łukašenka: Biełaruś zacikaŭlena ŭ dobrasusiedskich adnosinach ź ES, ale biez papiarednich umovaŭ
Biełaruś zacikaŭlena ŭ vybudoŭvańni ŭzajemapavažlivych i dobrasusiedskich adnosin ź Jeŭrapiejskim sajuzam. Pra heta siońnia zajaviŭ Alaksandr Łukašenka na sustrečy ź ministrami zamiežnych spraŭ Šviecyi An Linde i Finlandyi Pieka Chaavista, pieradaje BIEŁTA.
Łukašenka zajaviŭ, što Biełarusi cikavy pieradavy vopyt Jeŭrasajuza ŭ mnohich śfierach, ale dla pačatku treba zaviaršyć praces farmiravańnia dahavorna-pravavoj bazy i padpisać padrychtavanyja damovy.
«Biełaruś vielmi zacikaŭlena ŭ vybudoŭvańni ŭzajemapavažlivych, dobrasusiedskich adnosin nie tolki ź Jeŭrapiejskim sajuzam, ale i vašymi dziaržavami — Šviecyjaj i Finlandyjaj. Ja pra heta šmat razoŭ kazaŭ na praciahu mnohich hadoŭ. Dla nas vy źjaŭlajeciesia ŭ peŭnym sensie ŭzoram haspadarańnia. My vielmi padobnyja na vašyja krainy. U nas padobnaja ekanomika i, samaje hałoŭnaje, pracavityja, dužyja ludzi, — skazaŭ Alaksandr Łukašenka. — U nas šmat što atrymlivajecca. U vas bolš, u nas, moža, pakul krychu mienš. Ale ja spadziajusia, što vy nam padkažacie, u jakim kirunku ruchacca, pierš za ŭsio ŭ ekanomicy».
«Pažadana nie stavić nijakich papiarednich umoŭ.
Treba ruchacca ŭ hetym kirunku. Viadoma ž, pieramovy, damovy — heta doŭhi šlach, kampramisy, — adznačyŭ kiraŭnik dziaržavy. — Kali my ŭžo vypracavali adpaviednyja dahavory, pryjšli da razumieńnia taho, što nam treba ich padpisvać i ruchacca ŭ hetym kirunku, to ciahnuć z hetym nie varta».
«Vy bačycie, što vakoł nas robicca. I małyja, i siarednija dziaržavy pavinny niejak bližej być adzin da adnoj. Abjadnoŭvacca, kali heta mahčyma, kab vystajać u hetym ciažkim burnym śviecie», — upeŭnieny jon.
Alaksandr Łukašenka padkreśliŭ, što ŭ ahulnych intaresach, kab rehijon staŭ aazisam miru, spakoju i roskvitu. «Heta hałoŭnaje. Budzie heta — budziem bahatyja, buduć žyć narmalna našy narody, — skazaŭ kiraŭnik dziaržavy. — Mienavita da hetaha my imkniemsia, farmulujučy svaje mirnyja inicyjatyvy i prasoŭvajučy idei, nakiravanyja na źnižeńnie napružanaści i ŭmacavańnie dobrasusiedstva. Vidavočna, što takija padychody blizkija i vam. Niezdarma tak zvanaja razradka ŭ siamidziesiatyja hady atrymała nazvu «Chielsinki».
Heta pieršy vizit kiraŭnika šviedskaha źniešniepalityčnaha viedamstva ŭ Biełaruś, a ministr zamiežnych spraŭ Finlandyi pradstaŭlaje krainu, što staršyniuje ŭ ciapierašni čas u Saviecie Jeŭrapiejskaha sajuza.
Łukašenka taksama zaprasiŭ šviedskija i finskija kampanii da realizacyi ŭ krainie prajektaŭ
Kamientary