Chryścijanskija pryncypy, biełaruski patryjatyzm

Mienavita taki słohan 28 lutaha visieŭ u aktavaj zali Domu kultury MTZ, dzie prachodziŭ Ustanoŭčy źjezd partyi Biełaruskaja chryścijanskaja demakratyja. Za apošniaje dziesiacihodździe heta tolki druhaja sproba zarehistravać u krainie palityčnuju partyju.

Arhkamitet BCHD pačaŭ pracu jašče ŭ 2005 hodzie, ale da aktyŭnaj spravy pa rehistracyi chadeki padyšli tolki zaraz. Arhkamitet doŭha nie moh znajści pamiaškańnia dla pracy źjezdu, niekatoryja navat byli hatovyja pravodzić jaho na płoščy. Adnak urešcie byŭ atrymany dazvoł ad Minharvykankamu.

U šerahi zasnavalnikaŭ BCHD uvajšło 1060 čałaviek z usich rehijonaŭ krainy. Na źjeździe ž prysutničała 206 delehataŭ.

Što praŭda, u pałacy MTZ u hety dzień chapała ludziej ź inšych palityčnych sił. Naprykład, na źjeździe prysutničaŭ kiraŭnik Minskaha abłasnoha BNF Źmicier Vinahradaŭ ź Miadzieła. Byŭ zaŭvažany i paleski fiermier Mikałaj Haŭrylenka, jaki bałatavaŭsia na pasadu staršyni AHP.

Źjezd pačaŭsia ahulnaj malitvaj «Ojča naš», a taksama vykanańniem himnu «Mahutny Boža». Paśla čaho rej adrazu ŭziaŭ adzin z sustaršyń BCHD Pavieł Sieviaryniec. Jon pieraličyŭ tych ludziej, jakija svajoj pracaj najbolš spryčynilisia da stvareńnia biełaruskaj chadecyi.

Dvoje z hetaha śpisu nie zmahli prysutničać u zali. Hamialčanin Kastuś Žukoŭski hetymi dniami adbyvaje siamisutačnaje pakarańnie ŭ izalatary za akcyju ŭ abaronu biełaruskaj movy, a ŭ pastara Ernesta Sabiły prablemy sa zdaroŭjem.

Ažyŭleńnie ŭ zali vyklikała imia i proźvišča staršyni padlikovaj kamisii — Alaksiej Šydłoŭski. Niaŭžo toj samy, jaki niadaŭna atrymaŭ palityčny prytułak u Čechii? Až nie, nie toj.

U svaim spravazdačnym vystupie Sieviaryniec adznačyŭ, što siońnia kraina patanaje ŭ hrachach, a dla taho, kab niešta źmianić ludziam treba ćviordaje apiryšča i hetym apiryščam moža stać BCHD. «Biełaruskaja chryścijanskaja demakratyja stanie maralnaj bazaj dla demakratyčnych pieramien.

My nie stvarajem jašče adnu apazicyjnuju partyju, my stvarajem alternatyvu. My vierym, što z dapamohaj Božaj voli Biełaruś zažyvie pa pryncypach praŭdy svabody i spraviadlivaści. BCHD stavić sabie zadaču pieratvarycca ŭ viadučuju partyju krainy. BCHD — heta partyja pieramohi.

Jašče adzin sustaršynia i imavierny kandydat na pasadu prezidenta ad chryścijanskich demakrataŭ Vital Rymašeŭski zaznačyŭ, što siońnia ŭ partyju ŭvachodzić 45% pravasłaŭnych, 31% pratestantaŭ i 13% katalikoŭ. Jon nazvaŭ adnoj z hałoŭnych dalejšych metaŭ stvareńnie pravacentrysckaj kaalicyi dla ŭdziełu ŭ prezidenckich vybarach. A siarod stratehičnych partnioraŭ nazvaŭ Ruch za Svabodu, Partyju BNF, «Małady front».

Darečy, kandydat na pasadu prezidenta ad BCHD na źjeździe tak vyłučany i nie byŭ. Vyrašyli pieranieści na bolš poźni termin.

Potym byli vystupy jašče dvuch sustrašyń — Hieorhija Dźmitruka z Kobryna i Alaksieja Šeina. Apošni vidavočna sprabavaŭ paŭtarać styli telejevanhielistaŭ, chodziačy ź mikrafonam pa scenie. Šein siarod inšaha zasiarodziŭsia na pierajemnaści siońniašniaj BCHD z toj, jakaja dziejničała ŭ 1920‑ych.

Usie vystupoŭcy šmat havaryli pra pjanstva, aborty, samahubstvy, jak prykmiety ciapierašniaha času. Źjavy, ź jakimi treba vieści baraćbu.

Adzinym śviatarom, jaki pramaŭlaŭ u zału sa sceny, staŭ ksiondz Jury Barok z Hłybokaha, jaki zaznačyŭ, što albo ŭ Biełarusi budzie chryścijanskaja demakratyja, albo nie budzie nijakaj.

Płaŭna čarha pierajšła da haściej źjezdu.

Słova mieli amal usie pradstaŭniki apazicyjnaj palityčnaj elity — Alaksandr Milinkievič, Alaksandr Kazulin, Lavon Barščeŭski, Anatol Labiedźka, Mikoła Statkievič. Dobraja mahčymaść paraŭnać stylistyku vystupaŭ i charyzmu palitykaŭ. Jak padałosia z zali, najbolš hodna hladzieŭsia Anatol Labiedźka.

Zrešty, nie ŭsie słovy Labiedźki znajšli razumieńnie ŭ inšych haściej. Naprykład, staršynia AHP prapanavaŭ chadekam uvajści ŭ skład Abjadnanych demakratyčnych siłaŭ. Na heta z rezkaj krytykaj vystupiŭ lider «Maładoha frontu» Źmicier Daškievič, jaki skazaŭ, što jahonaj arhanizacyi tam nie miesca, pakul u ADS znachodziacca kamunisty. U svajoj antykamunistyčnaj rytorycy Daškievič nie strymlivaŭsia: «Nielha siadzieć na adnoj łavie pamiž Boham i šatanam».

Jašče Daškievič zaklikaŭ nie bajacca być nacyjanalistami i dy dvuchsensoŭna pracytavaŭ Bibliju:

"Jašče tymi dniami bačyŭ judejaŭ, jakija pabrali sabie ŭ žonki azamiecianak, amanicianak i maavicianak

i ad taho syny ich na pałovu havorać pa-azocki, ci movaj inšych narodaŭ, i nie ŭmiejuć havaryć pa-judejski.

Ja zrabiŭ im za heta vymovu i praklinaŭ ich, i niekatorych z mužoŭ biŭ, rvaŭ u ich vałasy, i zaklinaŭ ich Boham…”" (Kniha Niejemii, 13:23-25".

Prykładna a treciaj hadzinie BCHD možna było ličyć sfarmiravanaj. Była pryniataja prahrama i statut partyi. Padčas vybaraŭ sustaršyń siensacyj taksama nie adbyłosia, pasady zaniali Pavieł Sieviaryniec, Alaksiej Šein, Vital Rymašeŭski i Hieorhij Dźmitruk.

Dzion praź dziesiać siabry partyi źbirajucca padavać dakumienty na rehistracyju ŭ Ministerstva justycyi. A za tym u vypadku stanoŭčaha adkazu, jak kažuć, niepačaty kraj raboty. Toj samy Vital Rymašeŭski napiaredadni źjezdu havaryŭ, što idei BCHD hatovyja padtrymać 80% žycharoŭ Biełarusi.

• 0
• 0
• 0
• 0
• 0
• 0
• 0
• 0