Prezident Polščy Lech Kačynski 13 sakavika sustreŭsia ŭ Varšavie sa staršyniom nie pryznanaha biełaruskimi ŭładami Sajuza palakaŭ u Biełarusi (SPB) Anžalikaj Borys i aktyvistam abjadnańnia Andžejem Pačobutam.
U intervju BiełaPAN A.Pačobut paviedamiŭ, što kiraŭnictvam SPB pryniata rašeńnie pakul nie abviaščać sutnaść pieramoŭ z polskim prezidentam.
«My vielmi ŭdziačnyja prezidentu Polščy za padtrymku, — skazaŭ A.Pačobut. — Napiaredadni VII źjezda Sajuzu palakaŭ na Biełarusi, što pavinien adbycca ŭ Hrodnie 14—15 sakavika, skłałasia vielmi ciažkaja situacyja. Na delehataŭ akazvajecca vielizarny cisk, ludziam pahražajuć zvalnieńniem z pracy, kali jany voźmuć udzieł u źjeździe arhanizacyi. My vyrašyli pakul nie paviedamlać padrabiaznaści sustrečy z prezidentam Polščy, kab jašče bolš nie «razhojdvać» situacyju. Razam z tym, my zajaŭlajem, što kali biełaruskija ŭłady sarvuć źjezd, my vyjdziem na płošču i praviadziem akcyju pratestu».
Pavodle słoŭ aktyvista, na źjeździe płanujuć prysutničać pradstaŭniki Ministerstva zamiežnych spraŭ Polščy, polskich sojma i sienata, a taksama deputaty Jeŭraparłamienta. Delehaty źjezda praviaduć vybary kiraŭnictva SPB i padviaduć vyniki dziejnaści arhanizacyi za apošnija čatyry hady.
Kamientary