U Maskvie i Padmaskoŭi ŭłady zahadali piensijanieram siadzieć doma, zabaranili vychad na rabotu, vypłaciać im materyjalnuju dapamohu

Mer Maskvy Siarhiej Sabianin i hubiernatar Maskoŭskaj vobłaści paviedamili ab novych mierach pa baraćbie z raspaŭsiudžvańniem karanavirusa. Tak, u abodvuch rehijonach abaviazali zastavacca doma i vykonvać režym samaizalacyi z 26 sakavika da 14 krasavika žycharoŭ, starejšych za 65 hadoŭ, a taksama tych, chto maje chraničnyja zachvorvańni, pieradaje RBK. 

Vychodzić na vulicu pažyłym ludziam prapanujecca tolki ŭ vypadku krajniaj nieabchodnaści (u kramu ci apteku). U vypadku z Maskvoj Sabianin prapanavaŭ pa mahčymaści źjechać na daču.

«Kali vy pracujecie, prašu vas nie chadzić na pracu», — adznačyŭ u svaim zvarocie Sabianin. Pavodle jaho słoŭ, abaviazacielstva vykonvać chatni režym dla pažyłych ludziej nie tyčycca tolki kiraŭnikoŭ i supracoŭnikaŭ, «čyjo znachodžańnie na pracy žyćciova važna dla funkcyjanavańnia pradpryjemstvaŭ, arhanizacyj, ustanoŭ i orhanaŭ dziaržaŭnaj ułady, a taksama dla rabotnikaŭ achovy zdaroŭja». U inšym vypadku pracadaŭcy pavinny dać mahčymaść pažyłym abochvorym na chraničnyja zachvorvańni pracavać addalena albo dać im apłačvany adpačynak abo adpravić na balničny.

Ułady paabiacali hramadzianam, starejšym za 65 hadoŭ, i chranična chvorym ludziam razavuju materyjalnuju dapamohu. U Maskvie jana składzie ₽4000 (130 biełaruskich rubloŭ) (₽2000 avansam i stolki ž paśla zakančeńnia chatniaha režymu pry ŭmovie jaho adkaznaha vykanańnia).

U Maskoŭskaj vobłaści materyjalnaja dapamoha składzie ₽3000 (100 biełaruskich rubloŭ) na takich užo umovach (₽1500 adrazu i ₽1500 paśla 14 krasavika).

Paabiacali ŭłady i inšyja miery padtrymki pieraviedzienych na chatni režym pažyłych i chranična chvorych:

• u Maskvie apierataraŭ suviazi abaviazali nie adklučać im telefon i internet pry nulavym ci admoŭnym bałansie
• nie treba pakidać kvateru abo źjazdžać z dačy, kab apłacić kvitancyi pa pasłuhach ŽKH. Spahnańnie pieni i štrafaŭ za praterminoŭku apłaty pasłuh ŽKH časova admianiajecca ŭ Maskvie pažyłym i chranična chvorym ludziam
• paabiacali dapamahčy z dastaŭkaj praduktaŭ, lekaŭ i rašeńniem inšych bytavych prablem
• dla vykliku sacyjalnych rabotnikaŭ i vałancioraŭ vydzialajecca asobny numar telefona.

u Padmaskoŭi dadatkovyja miery padtrymki atrymajuć i školniki, jakija majuć prava na biaspłatnaje charčavańnie ŭ škołach, a ciapier siadziać doma. Im buduć pradastaŭlać praduktovyja nabory.

Sabianin taksama paprasiŭ pradstaŭnikoŭ maładoha pakaleńnia pa mahčymaści ŭstrymacca ad asabistych znosin z baćkami, babulami i dziadulami i naohuł pažyłymi ludźmi.

«Navat nie adčuvajučy simptomaŭ zachvorvańnia, vy možacie być nośbitami karanavirusa, jaki vielmi niebiaśpiečny dla pažyłych ludziej», — havorycca ŭ zvarocie mera Maskvy.

Pa aficyjnych dadzienych za apošnija sutki ŭ Maskvie zarehistravany 71 novy vypadak zaražeńnia karanavirusam. Ahulnaja kolkaść infikavanych u stalicy pieravysiła 200 čałaviek.

• 0
• 0
• 0
• 0
• 0
• 0
• 0
• 0