Łukašenku prapanavali refarmavać sistemu sudekśpiertyzy

Alaksandr Łukašenka pryniaŭ siońnia z dakładam staršyniu Dziaržaŭnaha kamiteta sudovych ekśpiertyz Andreja Švieda, paviedamlaje BiełTA.

«Hatovy vysłuchać vaš dakład pa ŭdaskanaleńni sistemy sudova-miedycynskaj ekśpiertyzy. Mianie cikavić toj uzrovień, na jaki my vyjšli, asabliva ŭ paraŭnańni z Rasijaj i inšymi dziaržavami. Jak uzajemadziejańnie ŭ hetym płanie ź mižnarodnymi ekśpiertnymi hrupami, kryminalistami?» — spytaŭ Alaksandr Łukašenka.

Jon nahadaŭ, što Dziaržaŭny kamitet sudovych ekśpiertyz stvaraŭsia faktyčna z nula. Da jaho ŭtvareńnia ŭ krainie nie była naładžana sistemnaja rabota pa mnohich vidach daśledavańniaŭ, nie chapała i nieabchodnych pryboraŭ. «My pastavili pierad saboj zadaču vyjści na bolš vysoki ŭzrovień u ekśpiertnaj dziejnaści pa ŭsich napramkach, pa ŭsich vidach złačynstvaŭ. Ci ŭdałosia nam hetu sistemu stvaryć, ci zdolna jana niezaležna, jak ciapier, isnavać? Tamu što prapanoŭ šmat: znoŭ jaje padparadkavać, pierapadparadkavać. Ja nie schilny da hetaha, ale pavinien być prahres. Kali jość efiektyŭnaść, tady nie treba łamać», — padkreśliŭ kiraŭnik dziaržavy.

Andrej Švied adznačyŭ, što z momantu ŭtvareńnia DKSE prajšło siem hadoŭ. Pavodle jaho słoŭ, biełaruskaja sistema sudovych ekśpiertyz unikalnaja i niezaležnaja, samaja lepšaja na postsavieckaj prastory. «Kožny hod my raźvivajemsia, niešta ŭdaskanalvajem», — dadaŭ jon.

Staršynia DKSE paśla sustrečy z Łukašenkam zajaviŭ žurnalistam, što rašeńnie ab utvareńni kamiteta całkam siabie apraŭdała. «U nas stvorana ŭnikalnaja, vysokaefiektyŭnaja sistema sudova-ekśpiertnaha zabieśpiačeńnia pravasudździa, jakaja nie maje anałahaŭ. Jaje efiektyŭnaść siońnia paćviardžajecca nie tolki vynikami raboty, nie tolki tym, što kalehi z pravaachoŭnych orhanaŭ usio bolš źviartajucca da nas pa dapamohu, ale i mierkavańniem mnohich zamiežnych śpiecyjalistaŭ, jakija ŭsio čaściej pryjazdžajuć da nas, u tym liku pavučycca. Tolki ŭ minułym hodzie ŭ nas prajšli navučańnie bolš jak 20 hrup zamiežnych śpiecyjalistaŭ, čaho raniej nie było. U dziasiatki razoŭ vyrasła kolkaść naviedvańniaŭ zamiežnych delehacyj, jakija pryzdžajuć paznajomicca z našym vopytam pa mnohich napramkach», — raskazaŭ Andrej Švied.

Adkazvajučy na pytańnie BIEŁTA, ci jość nieabchodnaść ciapier pierapadparadkoŭvać kamu-niebudź ekśpiertnyja padraździaleńni DKSE, kiraŭnik viedamstva padkreśliŭ, što ciapierašniaja sistema zarekamiendavała svaju efiektyŭnaść. «Jana nie staić na miescy, pastajanna raźvivajecca. Siońnia nam pa-dobramu zajzdrościać kalehi z mnohich dziaržaŭ», — źviarnuŭ uvahu jon.

Dziaržaŭny kamitet sudovych ekśpiertyz u 2019 hodzie pravioŭ amal 284 tys. daśledavańniaŭ. Pieravažnyja ekśpiertyzy - miedycynskija (bolš za 59 pracentaŭ), kryminalistyčnyja (18,5 pracenta) i psichijatryčnyja (10,3 pracenta). Bolš za ŭsio DKSE praviedziena daśledavańniaŭ dla padraździaleńniaŭ Śledčaha kamiteta i orhanaŭ unutranych spraŭ - 62,8 pracenta i 30,5 pracenta ad usich ekśpiertyz adpaviedna.

U 2018-2019 hadach Dziaržaŭny kamitet sudovych ekśpiertyz staŭ pravodzić novyja vidy daśledavańniaŭ: linhvistyčnyja (pa materyjałach, źviazanych z abrazaj, prajavaj ekstremizmu, i inšych vypadkach, dzie patrabujecca tłumačeńnie tekstu), kulturałahičnyja (dajuć mahčymaść adnieści materyjały da liku parnahrafičnych, vyrašyć pytańnie ab uzroście asoby na zdymku), hiemałahičnyja (na pradmiet adniasieńnia kamianioŭ da hrupy kaštoŭnych i vyznačeńnia ich charaktarystyk), praduktaŭ vystrału (dajuć mahčymaść adkazać na pytańni ab jaho akałaličnaściach).

• 0
• 0
• 0
• 0
• 0
• 0
• 0
• 0