«Va ŭsich u siamji pnieŭmanija». Čarhovaja achviara karanavirusa ŭ Minsku

4 krasavika a 20.00 u minskaj infiekcyjnaj balnicy pamior 69-hadovy były supracoŭnik Nacyjanalnaha banka Jury Osipaŭ. U jaho była pnieŭmanija, vyklikanaja virusam COVID-19, piša Radyjo Svaboda.

U hetaj ža ŭstanovie lažać z anałahičnym dyjahnazam dačka i žonka mužčyny. Svaboda pahavaryła z dačkoj Juryja Hannaj.

«Tata zachvareŭ krychu mienš, čym dva tydni tamu. Dumali, zvyčajnaja prastuda. Praź niekalki dzion vyklikali doktara, toj skazaŭ, što heta zvyčajny łarynhit, i vypisaŭ tabletki», — raspaviadaje Hanna. Mužčynu lepš nie stanaviłasia, ale padobnyja simptomy vyjavilisia i ŭ jaho žonki, a potym i ŭ dački, jakaja žyvie asobna, ale naviedvaje pažyłych baćkoŭ.

«Jasna, stali padazravać karonu. Tempieratura ŭ nas z maci padniałasia da 38—39. Ja pajšła ŭ 3-ju palikliniku, prasiła test. Kazała, što pa pracy kantaktuju z zamiežnikami. Test nie rabili, bo sama za miažu ja nie vyjazdžała», — kaža Hanna.

U kancy tydnia stała zrazumieła, što va ŭsich u siamji pnieŭmanija. Pakłali spačatku ŭ 10-ju balnicu, a kali ŭsio ž zrabili testy na karanavirus i vynik akazaŭsia stanoŭčy, pieraviali ŭ infiekcyjnuju. U Juryja Osipava ŭžo była vielmi nizkaja saturacyja (nasyčanaść kryvi kisłarodam) — tolki 83%, patrebny byŭ aparat štučnaj vientylacyi lohkich.

«My z maci lažym u adnoj dvuchmiesnaj pałacie, baćka — u inšaj. Učora pazvanili ź milicyi, skazali, što baćki bolš niama. Jak chavać — nie ŭjaŭlaju, my z mamaj u ciažkim stanie, stanoŭčaj dynamiki niama, pahadzilisia na ekśpierymientalnaje lačeńnie preparatami, jakimi lečać malaryju. Dobra, što ŭ baćki šmat siabroŭ, pachavańniem jany buduć zajmacca», — apaviadaje Hanna.

Žančyna adznačyła, što daktary ŭ infiekcyjnym špitali vielmi starajucca, robiać usio mahčymaje. Srodki asabistaj abarony taksama jość — heta i admysłovyja kambiniezony, i ščyty, i akulary, ale ŭ prybiralščyc tolki zvyčajnyja maski z tkaniny.

Hanna vielmi paprasiła pieradać usim, kab surjozna pastavilisia da karanavirusa:

«Spačatku taksama dumała, što heta nie strašniej za zvyčajny hryp. Ale heta nie tak, ludzi. Heta vielmi ciažki virus, kali pahłynuŭ usiu našu siamju. Pa sabie baču: kali chvaroba pierajšła ŭ ciažkuju stadyju, heta vielmi surjozna. Lekavańnie — heta chimija. Tabletki takija, što balić žyvot, piečań. Vielmi ciažka. Vidavočna, što patrebny karancin. Ale navat kali jaho niama, ja zaklikaju ŭsich bierahčy siabie i nie vychodzić z domu. Ja čuła, što pra pamierłych kaža Łukašenka. Nielha takoje havaryć. U 70 hadoŭ amal va ŭsich bukiet chvarobaŭ — heta i ankałohija, i serca, i inšyja chvaroby. U nas žyćcio takoje».

• 0
• 0
• 0
• 0
• 0
• 0
• 0
• 0