Ludzi, jakija chvareli na karanavirus, paviedamlajuć, što ich kličuć na parad. Ułady heta admaŭlajuć

Minčuki, jakija ačuniali paśla COVID-19, raspaviadajuć, što ich pa telefonie zaprašajuć na parad 9 Maja. Tyja, chto telefanavaŭ, pradstaŭlajucca supracoŭnikami administracyj rajonaŭ Minska. Adnak u samich rajonnych administracyjach zvanki admaŭlajuć. Tut.by tak i nie ŭdałosia daviedacca, chto moh telefanavać minčukam z takoj prapanovaj.

Pavialičyć

Adzin z tych, chto pierachvareŭ na karanavirus, raskazaŭ, što na hetym tydni jamu patelefanavali na asabisty mabilny. Čałaviek pradstaviŭsia supracoŭnikam administracyi Savieckaha rajona Minska i prapanavaŭ jamu jak čałavieku, što vyzdaravieŭ ad karanavirusa, naviedać 9 maja parad. Mužčyna admoviŭsia, jak jon tłumačyć, — «pa mierkavańniach sumleńnia».

Žurnalisty patelefanavali pa numary, jaki zachavaŭsia ŭ jaho telefonie. Tam skazali, što heta kamisija pa spravach niepaŭnaletnich administracyi Savieckaha rajona Minska. Adnak nie zmahli padkazać, ci abzvońvaŭ niechta z takoj prapanovaj ź ich numara telefona ludziej, jakija ačuniali. Pry hetym adznačyli, što ničoha pra padobnyja mierapryjemstvy nie čuli.

Namieśnik kiraŭnika administracyi Savieckaha rajona Aksana Vołkava paviedamiła, što jany nie abzvońvali tych, chto vyzdaravieŭ, i što žadajučyja pajści na parad i tak jość.

— U nas jość zaprašalnyja na parad, i arhanizacyi — chto choča — źviartajucca. U nas nasamreč jość žadajučyja, jakija biaruć kvitki, — prakamientavała jana.

Adnak na parad zaprašali nie adnaho byłoha pacyjenta z COVID-19.

— Mnie patelefanavali siońnia, skazali, što da mianie jość nieardynarnaje pytańnie: moža być, ja b chacieła pryjści na parad 9 Maja? Skazali, što telefanujuć z administracyi Maskoŭskaha rajona, — adznačaje minčanka, jakaja pierachvareła na COVID-19.

U hetym vypadku pieratelefanavali pa numary, ź jakoha źviazvalisia ź dziaŭčynaj. Tam paćvierdzili, što heta administracyja Maskoŭskaha rajona, ale supracoŭnica, jakaja źniała trubku, udakładniła, što telefonam karystajecca nie jana adna, jana asabista nikomu pa takich pytańniach nie telefanavała i naohuł pra padobnyja prapanovy nie čuła.

Va ŭpraŭleńni ideałahičnaj raboty, kultury i pa spravach moładzi administracyi Maskoŭskaha rajona taksama paviedamili, što ačuniałych ad karanavirusa nie abzvońvali, pry hetym «siońnia možna patelefanavać i pradstavicca kim chočaš».

Atrymać apieratyŭny kamientar u Minharvykankamie nie ŭdałosia.

• 0
• 0
• 0
• 0
• 0
• 0
• 0
• 0