Šrajbman: Usia łohika samazachavańnia ŭłady kaža za toje, kab nie rehistravać Babaryku

Važnaja raźviłka hetych vybaraŭ — rašeńnie ab rehistracyi Babaryki. Jon sabraŭ rekordnuju kolkaść podpisaŭ za historyju Biełarusi siarod alternatyŭnych kandydataŭ. Ciapier užo 230 tysiač, moža na vychadzie być pad 300, a to i bolš.

Pa ŭsich anłajn-apytańniach, pa kolkaści ludziej u hrupie, pa ŭvazie presy, pa dastupnych hrošach Babaryka — hałoŭny apanient Łukašenki na hetych vybarach. Apošnija tydni jaho rytoryka stanaviłasia ŭsio śmialejšaj, užo adkryta dapuskaje svoj udzieł u pratestach, pracuje na raskoł elit i, miarkujučy pa ŭsim, chutka nabiraje papularnaść.

Usia łohika samazachavańnia ŭłady kaža za toje, kab nie rehistravać. Da dnia vybaraŭ jon moža sabrać niekamfortna vialikuju padtrymku. Lahčej źbić na padlocie.

Budzie skandał, ale skandał z 5% u dzień vybaraŭ moža być jašče bolšym. Kali ŭsie ŭbačać, što adzin stos u dva razy bolšy za druhi, ale druhi atrymlivaje 78%, moža zazboić na miescach. A potym i ŭ centry Minska. 

Ale źniać na rehistracyi — heta taksama krok u trochi novuju realnaść. Jašče nikoli ŭ historyi Biełarusi čałavieka, jaki sabraŭ realna 100 tysiač podpisaŭ, nie filtravali na hetym etapie. A tym bolš favaryta siarod alternatyŭnych kandydataŭ.

Takoje rašeńnie nie ździvić tradycyjny apazicyjny elektarat. Ich nie ździvić, navat kali ŭ Babaryki ŭ domie znojduć stvały «Biełaha lehijonu», džyp, jaki prarvaŭsia praź miažu, tapki Cichanoŭskaha, 900 młn rasiejskich rubloŭ i pakiet marychuany z adbitkami Čudziancova. 

Ale heta budzie smačnaj aplavuchaj raniej apalityčnym ludziam, jakija aktyŭna ŭklučylisia ŭ hetuju kampaniju i nie pryvykli bujnym płanam bačyć usiu viasiołku instrumientaŭ ułady. Jany niešta čuli raniej pra niesumlennyja vybary, ale palityka była na pieryfieryi ich śvietu.

A zaraz u ich uźnikła nadzieja. Jany chutka palityzujucca i čakajuć zachavańnia minimalnych ramak prystojnaści. U Babaryki i Capkały hrupy ŭ sumie — pad 10 tysiač, i heta tolki tyja, chto paśpieŭ zapisacca za pieršy tydzień, heta značyć viaršynia ajśbierha.

Jak jany adreahujuć na aplavuchu? Častka budzie demaralizavanaja, stracić nadzieju, častka — razzłujucca tak, jak nie złavalisia da hetaha času. Jany adčujuć siabie vypchnutymi ź lehalnaha pola. Jany pračytajuć u dziejańniach ułady prosty pasył: nijakich zakonnych šlachoŭ niešta źmianić my vam nie damo, źbiarycie choć miljard podpisaŭ.

Voś tut i moža adbycca aljans dvuch niezadavolenych słajoŭ novaj biełaruskaj apazicyi — umoŭnaha elektaratu Cichanoŭskaha i razzłavanaj častki elektaratu Babaryki. 

Akramia taho, uśviedamleńnie falšyvaści pracesu budzie našmat šyrejšym, čym zaŭsiody, u hramadstvie, dy i siarod vyšejšaj namienkłatury. Tam, naviersie, kožny adychod ad ramak prystojnaści da hetaha času možna było lohka sabie racyjanalizavać, pierakanać siabie, što heta chłuśnia abo paskudstva ŭ imia vyratavańnia.

Razhony ŭ 2006, 2010, 2017 — tak było treba, kab nie dapuścić chaosu, jany sami naryvalisia, parušyli zakon. 80% u dzień vybaraŭ — nu ŭsio roŭna jon samy papularny, navat kali nie 80%, ale alternatyŭ ža niama. Sprava «Biełaha lehijonu» i sprava Cichanoŭskaha — nu jany realna mutnyja chłopcy, dymu biez ahniu nie byvaje, usio roŭna vypuściać chutka.

Nierehistracyja Babaryki nie ŭkładziecca ŭ hetyja ramki samaapraŭdańnia. Usim stanie vidavočna, što heta prosta padnožka z-za strachu ŭ časy, miarkujučy pa ŭsim, rekordna nizkaha rejtynhu. Inšaha tłumačeńnia tut nie budzie.

Asadačak zastaniecca i ŭ mnohich unutry sistemy. Spadziavacca na ludziej z takim asadačkam budzie składana. Asabliva ŭličvajučy vał historyj ab uzrosłym rasčaravańni ŭnutry sistemy z-za pandemii — pryčym jak u cyvilnych viedamstvach, tak i ŭ siłavych.

Ułada trapiła ŭ novuju dla siabie realnaść, kali treba vybirać pamiž drennymi rašeńniami, i ty nie razumieješ zahadzia, jakoje «drenna» budzie horšym. 

Toje ž samaje i ŭ ekanomicy, i ŭ adnosinach z Rasijaj. Adsiul i niervy naviersie. Tak vyhladaje poźniaja vosień usich aŭtakratyj. Tolki ja b nie śpiašaŭsia radavacca, kali vy daŭno hetaha čakali. Hetyja vosieni byvajuć doŭhimi i časta pieraciakajuć u zimu.

• 0
• 0
• 0
• 0
• 0
• 0
• 0
• 0