108 tysiač podpisaŭ. Kiraŭnik štaba Kisiel zabłytaŭsia ŭ ličbach, a paśla pryznaŭsia ŭ hrubych parušeńniach
Voś užo katoryja zapar prezidenckija vybary ŭ Biełarusi źjaŭlajucca zahadkavyja pretendenty, pra jakich ničoha nie viedaje hramadstva i jakija nie demanstrujuć anijakaj aktyŭnaści pa zbory podpisaŭ. Ale paśla jany zanosiać ŭ vybarčyja kamisii niezrazumieła adkul uziatyja 100 tysiač podpisaŭ i stanoviacca kandydatami.
Adnym z takich zahadkavych kandydytaŭ sioleta moža stać Natalla Kisiel — namieśnica dyrektara kampanii «Kisiel V. V.», jakaja pracuje ŭ śfiery hruzapieravozak. U jaje padtrymku nibyta sabrana 108 tysiač podpisaŭ.
Kiraŭnik inicyjatyŭnaj hrupy Siarhiej Štoda pachvaliŭsia ŭ kamientary «Radyjo Svaboda», što ŭ inicyjatyŭnaj hrupie byli rekardsmieny, jakija sabrali ažno kala 500 podpisaŭ.
Inicyjatyŭnaja hrupa Kisiel składajecca sa 147 udzielnikaŭ. Podpisaŭ sabrana trochi bolš za 108 tysiač. To-bok kožny zborščyk musiŭ padpisać u siarednim pa 735 čałaviek.
Štoda ž radasna rapartuje, što rekardsmieny prynieśli pa 500 podpisaŭ. Astatnija, atrymlivajecca, jašče mienš.
Z čempijonskimi ličbami nie sychodzicca. Adkul prablemy z matematykaj?
«Naša Niva» źviarnułasia pa kamientar da samoha Siarhieja Štody.
«U nas 2500 čałaviek zajmalisia zboram, tamu nie skłała ciažkaściaŭ sabrać podpisy ŭ momant. Aficyjna z paśviedčańniami było 147 čałaviek, ale ŭ nas za ŭvieś čas ni adzin čałaviek nie spytaŭ paśviedčańnie, — tłumačyć Štoda. — A vy što, dumajecie, što va ŭsich, chto źbiraje podpisy, jość paśviedčańnie z saboj?
Nu voś u mianie žonka na pracy źbirała. 150 čałaviek u ich pracuje. Jana pajšła i padpisała na majo imia ŭsich na pracy. Nu i što?» — pryznaŭsia ŭ hrubym parušeńni vybarčaha zakanadaŭstva kiraŭnik inicyjatyŭnaj hrupy Natalli Kisiel. Aŭdyjazapis razmovy jość u Redakcyi «Našaj Nivy». Siarhiej Štoda byŭ papiaredžany pra viadzieńnie aŭdyjazapisu.
«Ja vam vobrazna, nie pišycie pra maju žonku, a to buduć prablemy ŭ vas», — zajaviŭ jon karespandentu «NN».
Pavodle zakanadaŭstva podpisy, jakija źbiraŭ nie siabar inicyjatyŭnaj hrupy, a treciaja asoba, ličacca niesapraŭdnymi.
Ciapier čytajuć
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»2
Kamientary