TBM nie budzie padtrymlivać kandydataŭ u prezidenty, jakija ihnarujuć biełaruskuju movu
Tekst zvarotu Tavarystva biełaruskaj movy jaho staršynia (i byłaja deputatka) Alena Anisim apublikavała ŭ svaim fejsbuku.
«Naša hramadstva patrabuje źmienaŭ. Sioletniaja vybarčaja kampanija vyznačajecca źjaŭleńniem novych jaskravych postaciej, jakija vyłučyli svaje kandydatury, kab pazmahacca za samuju vysokuju pasadu», — havorycca ŭ zvarocie.
Razam z tym źviartajecca ŭvaha na toj fakt, što «šerah asobaŭ, ź jakimi vialikaja kolkaść hramadzian krainy źviazvaje nadziei na doŭhačakanyja pieramieny ŭ sacyjalna-ekanamičnym i palityčnym žyćci, nie vałodajuć dziaržaŭnaj biełaruskaj movaj i nie vykarystoŭvajuć jaje padčas zboru podpisaŭ za svajo vyłučeńnie».
«U suviazi z hetym uźnikaje pytańnie: ci zdolnyja hetyja ludzi naležnym čynam vykonvać abaviazki pieršaj asoby ŭ krainie, kali jany nie adpaviadajuć kvalifikacyjnamu patrabavańniu, abaviazkovamu dla słužbovaj asoby luboha ŭzroŭniu?
Demanstratyŭnaje ihnaravańnie niekatorymi kandydatami biełaruskaj movy padčas kampanii zboru podpisaŭ vyhladaje jak abraza ŭsim hramadzianam, jakija razumiejuć značeńnie hetaj kaštoŭnaści dla isnavańnia Biełarusi jak suvierennaj niezaležnaj dziaržavy. Prezident, jaki nie vałodaje rodnaj movaj svajho naroda, dyskredytuje siabie, a razam i krainu, jakuju jon pradstaŭlaje.
«Tavarystva Biełaruskaj movy zajaŭlaje ab tym, što nie budzie padtrymlivać tych, chto parušaje Kanstytucyju i ihnaruje moŭnyja pravy hramadzian, i raić usim vybarščykam zadumacca, ci varta hałasavać za takich pretendentaŭ, jakija nie pavažajuć svoj narod, jaho movu, historyju, kulturu i simvały», — adznačajecca ŭ zvarocie.
Kamientary