Sudzili chłopca, jaki telefanavaŭ u milicyju daviedacca, jak jamu dabracca na pracu biez zatrymańniaŭ
24 červienia Ivan Prus patelefanavaŭ u Maskoŭski RAUS, kab spytać, jak jamu dabracca na pracu biez zatrymańniaŭ. Zvanku papiaredničała brutalnaje zatrymańnie ludziej u «łancuhach salidarnaści» i čerhi kala kramy Symbal.by. Telefanavali ŭ milicyju z padobnym pytańniem i inšyja minčuki, ich razmova paźniej źjaviłasia ŭ siecivie. Užo 26 červienia Ivana zatrymali ŭ centry horada. Siońnia jaho sudzili za drobnaje chulihanstva: milicyjanty paličyli, što svaim 3-chvilinnym zvankom jon adciahnuŭ ich ad pracy, čym prajaviŭ vidavočnuju niepavahu da hramadstva, piša Tut.by.
Siabry Ivana kažuć, što jon litaralna źnik u piatnicu viečaram. Tolki na nastupny dzień udałosia vyśvietlić, što jaho zatrymali, dastavili ŭ Maskoŭskaje RUUS, paśla čaho pavieźli ŭ izalatar na Akreścina.
Vychadnyja ŭpieršyniu zatrymany Ivan Prus pravioŭ u Centry izalacyi pravaparušalnikaŭ, dzie zvyčajna siadziać asudžanyja na «sutki».
Na pytańni suda jon adkazvaje z kletki, choć inšyja zatrymanyja, na pracesach jakich była presa, davali pakazańni, siedziačy za stałom adnaho z kabinietaŭ izalatara na Akreścina.
Raparty ab pravaparušeńni padali staršy apieratyŭny dziažurny Karpienia i staršy inśpiektar Maskoŭskaha RUUS Bakačeŭski. U pratakole paznačana, što 24 červienia Ivan Prus patelefanavaŭ z mabilnaha ŭ dziažurnuju słužbu Maskoŭskaha RUUS i zadaŭ pytańnie, jakoje nie adnosicca da kampietencyi milicyi, a mienavita: jak jamu biaśpiečna dabracca na pracu biez zatrymańniaŭ, biez taho, kab jaho nie spakavali ŭ aŭtazak. Darečy, dziažurny jamu adkazaŭ: «Nie parušać praviły hramadskaha paradku, i ŭsio». Bolš za toje, zapeŭniŭ, što naohuł nikoha nie zatrymlivajuć.
Na dumku pravaachoŭnikaŭ, hety zvanok pieraškadžaŭ ich pracy, svaimi dziejańniami Prus prajaviŭ vidavočnuju niepavahu da hramadstva, heta značyć ździejśniŭ drobnaje chulihanstva (art. 17.1 KaAP).
Ivan Prus, znachodziačysia ŭ kletcy, pa videasuviazi paviedamiŭ, što za čas, praviedzieny ŭ izalatary, usio ŭśviadomiŭ, pryznaje siabie vinavatym i raskajvajecca ŭ zroblenym. Pavodle jaho słoŭ, jon adčuŭ stres u izalatary, nikoli raniej jaho nie zatrymlivali.
Sudovy praces praciahvaŭsia 15 chvilin. Praź dźvie hadziny, praviedzienyja u daradčym pakoi, sudździa Lidzija Cialica abviaściła pastanovu — štraf 20 bazavych vieličyń (540 rubloŭ).
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary