Jeŭraparłamientaryi: Nastaŭ čas znoŭ uvieści sankcyi suprać režymu Łukašenki

31 deputat Jeŭraparlemienta — pradstaŭniki roznych jaho frakcyj — źviarnulisia da Jeŭrakamisii i ŭsich dziaržaŭ —​ udzielnic ES pierahledzieć rašeńnie 2016 hoda ab źniaćci sankcyj z šerahu biełaruskich čynoŭnikaŭ i kampanij, piša Radyjo Svaboda.

List «Ab źniavoleńni palityčnaj apazicyi ŭ Biełarusi» adrasavany staršyni JEK Ursule fon der Lajen, staršyni Jeŭrapiejskaj rady Šarlu Mišelu i viarchoŭnamu pradstaŭniku ES pa zamiežnych spravach i palitycy biaśpieki Žuzepu Barelu.

U im havorycca:

«Ułady Biełarusi pad kiraŭnictvam prezidenta Łukašenki apošnim časam ŭzmacnili nastup na demakratyčnyja pravy ŭ krainie napiaredadni prezidenckich vybaraŭ, pryznačanych na 9 žniŭnia. Jany źniavolvajuć kandydataŭ u prezidenty, pradstaŭnikoŭ apazicyi i zvyčajnych hramadzian padčas pikietaŭ dla zboru podpisaŭ. Šyroka paviedamlajecca taksama pra aryšty žurnalistaŭ i błohieraŭ.

Hetyja advolnyja aryšty spraviadliva vyklikajuć asudžeńnie va ŭsim śviecie. My, što nižej padpisalisia, byli rady bačyć, što Jeŭrapiejskaja słužba vonkavych suviaziaŭ i Jeŭrapiejskaja kamisija zaniali ćviorduju pazicyju suprać hetaha. Adnak, jak zaŭsiody, dziejańni tut hučniejšyja za słovy.

Pa miery nabližeńnia da prezidenckich vybaraŭ hety krok vyhladaje važnym jak nikoli. Adsutnaść zachadaŭ u baraćbie z pandemijaj u krainie vyjaviła niekampietentnaść kiravańnia Łukašenki pierad bolšaściu nasielnictva.

U 2016 hodzie Rada pryniała rašeńnie ab źniaćci sankcyj z 170 pryvatnych asob i troch kampanij u Biełarusi. Uličvajučy apošnija padziei, my musim pierahledzieć hetaje rašeńnie. Tamu my zaklikajem vas pierahledzieć i pašyryć śpis sankcyj suprać biełaruskich čynoŭnikaŭ i kampanij, datyčnych da abmiežavańnia pravoŭ čałavieka i demakratyi padčas hetaj vybarčaj kampanii.

U hetym kantekście my taksama nahadvajem pra važnaść tak zvanaha aktu Mahnickaha na ŭzroŭni ES, jak heta vykazała bolšaść Jeŭraparłamienta ŭ svajoj rezalucyi ad 14 sakavika 2019 hoda. Heta było b vielmi važnym instrumientam u rasparadžeńni ES dla taho, kab utrymać suśvietnaje lidarstva ŭ adstojvańni pravoŭ čałavieka. My zaklikajem Jeŭrakamisiju, Jeŭrapiejskuju słužbu vonkavych suviaziaŭ i dziaržavy-ŭdzielnic aktyvizavać svaje namahańni i jak najchutčej zaviaršyć stvareńnie takoha režymu sankcyj».

Na čale padpisantaŭ — deputaty Karyn Karłsbru (Šviecyja) i Piatras Aŭštravičus (Litva). List padpisaŭ 31 deputat, jany pradstaŭlajuć usie parłamenckija hrupy, aprača pravapapulisckaj jeŭraskieptyčnaj «Identyčnaść i demakratyja».

• 0
• 0
• 0
• 0
• 0
• 0
• 0
• 0