MZS Litvy: Važny nie dzień vybaraŭ u Biełarusi, a pieršy dzień paśla vybaraŭ
Ministr zamiežnych spraŭ Litvy Linas Linkiavičus zajaviŭ, što važny nie stolki sam dzień vybaraŭ prezidenta ŭ Biełarusi, kolki pieršy dzień paśla hetych vybaraŭ, paviedamlaje Delfi.lt.
«Dzień paśla vybaraŭ i źjaŭlajecca samym važnym. Na sam dzień vybaraŭ ja nie rabiŭ by prahnozaŭ, što moža zdarycca niešta asablivaje. ( … ) Važny pieršy dzień paśla vybaraŭ, kali buduć abvieščanyja vyniki. Tady vielmi važnaja reakcyja ŭłady i apazicyi na hetyja vyniki. Voś tady i budzie vidać, nakolki hramadstva saśpieła dla hetaha pavarotu, pieramienaŭ, što macniejšaje: strach abo niemahčymaść dalej žyć u tych umovach, jakija jość ciapier. Heta ŭžo budzie zaležać ad samich žycharoŭ Biełarusi, i sapraŭdy tolki jany sami mohuć vyrašać», — zajaviŭ u čaćvier radyjostancyi Ziniu radijas Linas Linkiavičus.
Padobnuju zakłapočanaść ministr vykazaŭ i niekalki dzion tamu ŭ razmovie pa telefonie ź ministram zamiežnych spraŭ Biełarusi Uładzimiram Makiejem.
Linkiavičus taksama ličyć, što prezidenckija vybary ŭ Biełarusi prachodziać nieprazrysta, biez vykanańnia mižnarodnych pravavych normaŭ.
Litva, adznačyŭ ministr, uvažliva naziraje za situacyjaj u susiedniaj krainie, atrymlivaje infarmacyju i ad uładaŭ, i ad pradstaŭnikoŭ apazicyi.
«Adzinaje naša čakańnie i patrabavańnie, kab nie vykarystoŭvalisia zališnija siły, a taksama hvałt suprać demanstrantaŭ, pradstaŭnikoŭ apazicyi, bo, mahčyma, heta budzie adbyvacca pad prykryćciom mienavita abarony ad źniešniaha voraha abo ad niestabilnaści», — dadaŭ ministr.
Kamientary