Režysiorka BT: Kažuć, u teleradyjokampanii bajacca, što zabastoŭščyki zachopiać budynak
Alaksandra Babkova — maładaja režysiorka, jakaja pracavała na kanale «Biełaruś 3». Paśla prezidenckich vybaraŭ jana dałučyłasia da zabastoŭki.
Što padšturchnuła jaje na taki krok, Alaksandra raspaviała «Našaj Nivie».
«Naš kanał «Biełaruś 3» zajmajecca kulturaj dy mastactvam. Ja rabiła prahramy pra mastakoŭ, teatr, mastacki muziej. Zaraz my pačali pracu nad filmam pra Karatkieviča, kudy ja zaprasiła paŭdzielničać aktoraŭ, jakija nie pracujuć u teatrach, a zaniatyja na časovych prajektach, kab padtrymać ich u takoj situacyi: ja liču heta važnym. Film, zrazumieła, my rabić užo nie budziem, na žal, — raskazvaje Alaksandra.
Karaciej, tematyka telekanała zaŭsiody była dalokaja ad palityki, i my ŭsie adčuvali siabie adasoblena ad ahienctva telenavinaŭ, dzie zaŭsiody padtrymlivali režym. Ale apošnija naviny, źviazanyja ź mirnymi mitynhami, ciarpieć było ŭžo niemahčyma. My źviartalisia da Ivana Ejsmanta i vykazvali jamu svaje chvalavańni dy niezadavolenaść, ale, zrazumieła, jon ničoha nie zrabiŭ i sumlennyja fakty ŭ efiry nie pakazaŭ. Tamu my nie bačyli inšaha vyjścia, jak bastavać ci zvalniacca».
Pakul što naminalna Alaksandra jašče rabotnik teleradyjokampanii:
«Ja jašče źjaŭlajusia supracoŭnikam BT, ale razam z šeraham svaich kaleh bastuju. Siońnia, jak vy ŭžo možacie viedać, nas nie puścili na terytoryju Makajonka, 9. My krychu razhubilisia, tamu praź niekalki hadzin raźjechalisia chto kudy. Jak budziem bastavać i što rabić dalej, pakul nieviadoma. Jak nieviadoma i toje, ci źjaŭlajecca zahad nie puskać nas da BT namiokam na naša chutkaje zvalnieńnie».
Z kalehami, jakija praciahvajuć pracu, dziaŭčyna nie havaryła. Tamu nie moža paćvierdzić ci abvierhnuć čutki pra rasijskich techničnych rabotnikaŭ, jakich nibyta pryvieźli na zamienu pratestujučym.
«Čuła raspoviedy, što tyja, chto zastaŭsia, nie padtrymlivajuć našy dziejańni i navat bajacca, što my płanujem zachapić budynak. Adna maja kaleha, jakaja vychodziła na zabastoŭku, ale praciahvała vykonvać niekatoryja abaviazki, kaža, što susiedki pa kabiniecie psichałahična cisnuć na jaje, chacia pamiž imi byli zaŭsiody dobryja adnosiny», — kaža Babkova.
Ciapier čytajuć
Biełaruska nabiła na ciele partrety Łukašenki i jaho synoŭ, Umki, Pucina dy Si Czińpina10
Kamientary