Deputaty PA ABSE abmiarkujuć biełaruskaje pytańnie

Deputaty ŭžo zapisalisia dla ŭdziełu ŭ dyskusii. Pra heta našamu radyjo siońnia paviedamiŭ pa telefonie z Bruselu, dzie 3 lipienia pačałasia čarhovaja sesija Parlamenckaj Asamblei ABSE, kiraŭnik Abjadnanaj hramadzianskaj partyi Anatol Labiedźka. Jak my ŭžo paviedamlali, dyskusiju adnosna sytuacyi ŭ Biełarusi 5 lipienia arhanizuje kiraŭnica specyjalnaj hrupy ŭ spravach Biełarusi Parlamenckaj Asamblei ABSE Uta Capf.

Siońnia Anatol Labiedźka pravioŭ šerah kansultacyj z deputatami Parlamenckaj Asamblei ABSE, jakija pradstaŭlajuć Niamieččynu, Čechiju. Słavaččynu dy inšych delehacyj. U časie sustrečaŭ abmiarkoŭvaŭsia ichni ŭdzieł u zaŭtrašniaj dyskusii adnosna sytuacyi ŭ Biełarusi.

Da hetaha času niapeŭna, u jakim farmacie projduć debaty, pakolki aficyjnaja delehacyja Nacyjanalnaha schodu na čale ź vice-śpikieram Pałaty pradstaŭnikoŭ Siarhiejem Zabałotcam pakul nie paćvierdziła svajho ŭdziełu ŭ kruhłym stale. Pieršaha sakratara Partyi kamunistaŭ (Biełaruskaj) Siarhieja Kalakina heta nie ździŭlaje:

(Kalakin: ) «Tut jak vyznačyć Łukašenka, tak i budzie».

Darečy, Siarhiej Kalakin siońnia ŭ druhoj pałovie dnia nakiravaŭsia ŭ Brusel dla dapamohi Anatolu Labiedźku. Mienavaita lidery dźviuch partyjaŭ i buduć pradstaŭlać biełaruskuju palityčnuju apazycyju padčas debataŭ. Ci jość nadzieja, što dyskusija pryniasie plon? Lider AHP havoryć, što na heta pieradusim spadziajucca mižnarodnyja parlamentary:

(Labiedźka: ) «Jość niejkaja takaja nadzieja, što možna praz zvyčajnyja mechanizmy, demakratyčnyja pracedury ŭździejničać, paŭpłyvać na sytuacyju. Adkazam na heta budzie navat toje, ci pojdzie aficyjny bok na ŭdzieł u kruhłym stale».

U centry dyskusii buduć prablemy pravoŭ čałavieka i źmieny vybarčaha zakanadaŭstva. Adnak u Bruseli źbirajucca pačuć ad aficyjnaj biełaruskaj delehacyi i toje, jak Biełaruś vykonvaje svaje abaviazańni ŭ ramkach ABSE. Pra heta havoryć i kiraŭnička specyjalnaj rabočaj hrupy ŭ spravach Biełarusi spadarynia Capf:

(Capf: ) «I, kaniečnie, ja maju namier abmierkavać i niekatoryja inšyja temy, što stajać na paradku dnia našaj rabočaj hrupy».

Pavodle Anatola Labiedźki, u abmierkavańni biełaruskaha pytańnia voźmuć udzieł niekalki dziesiatkaŭ deputataŭ PA ABSE. Prahnazujecca, što da pačatku dyskusii kolkaść mižnarodnych parlamentaroŭ, jakija chočuć abmierkavać hetaje pytańnie, uzraście. Na karyść hetaha śviedčyć raniejšy dośvied – niepasredna ŭ dzień debataŭ da raniej zajaŭlenych deputataŭ abaviazkova dałučajecca jašče peŭnaja kolkaść.

Radyjo Svaboda

• 0
• 0
• 0
• 0
• 0
• 0
• 0
• 0