Pieršy pakaz doŭhačakanaj stužki «Kupała» nacyjanalnaj kinastudyi projdzie na placoŭcy mižnarodnaha fiestyvalu kino krain Sadružnaści «Maskoŭskaja premjera». Sioleta jon adbudziecca druhi raz. Publicy karcinu pradstaviać režysior Uładzimir Jankoŭski i členy zdymačnaj hrupy.
Nahadajem, pieršy pakaz «Kupały» mieŭ adbycca jašče ŭ śniežni minułaha hoda ŭ Biełarusi, ale z-za peŭnych niedaskanałaściaŭ jaho ŭ apošni momant admianili. Zrešty, pakazu nie adbyłosia i paźniej: «Biełaruśfilm» raźličvaŭ na suśvietnuju premjeru stužki na prestyžnym fiestyvali. Potym u sieciva trapiła čarnavaja viersija «Kupały», mierkavany pakaz na minskim «Listapadzie» nie paćvierdziŭsia, a siońnia źjaviłasia infarmacyja ab suśvietnaj premjery ŭ Maskvie.
«Naŭrad ci vy zmožacie nazvać vialikuju kolkaść fiestyvalaŭ, jakija ŭ hetym hodzie narmalna adbylisia, — kamientuje dyrektar «Biełaruśfilma» Uładzimir Karačeŭski. — Mnohija albo admianilisia, albo pieramiaścilisia ŭ anłajn, tamu stratehiju prasoŭvańnia «Kupały» nam nie ŭdałosia realizavać tak, jak my płanavali. Jak vy bačyli, hod akazaŭsia nie najlepšym dla hučnych premjer. My adpraŭlali zajaŭki na viadučyja fiestyvali — niedzie jany pieranosilisia, niedzie nam admaŭlali, niedzie my nie traplali ŭ farmat, tamu pry ŭsim našym žadańni vialikaja fiestyvalnaja historyja ŭ «Kupały» sioleta nie atrymałasia. Urešcie my abmierkavali zaprašeńnie «Maskoŭskaj premjery» z šeraham śpiecyjalistaŭ śfiery kino, i jany skazali, što fiestyval choć i małady, maje niadrenny jakasny ŭzrovień».
Na «Maskoŭskaj premjery» karcina budzie pakazana jak śpiecpadzieja — sieans pryznačany na 14 listapada ŭ Traćciakoŭskaj halerei. «Film pra žyćcio vybitnaha biełaruskaha piśmieńnika dobra padychodzić da samaj kłasičnaj placoŭki Rasii. Toje, što my arhanizujem pakaz stužki, dla nas vialiki honar, tym bolš heta jaje suśvietnaja premjera», — kaža dyrektar fiestyvalu Maksim Carkoŭ.
Pavodle spadara Maksima, fiestyval zacikaviŭsia filmam, bo toj vyklikaŭ šmat šumu ŭ biełaruskich ŚMI: «Ja prapanavaŭ našamu mastackamu kiraŭniku zrabić pakaz u Maskvie, kali ŭ dadzienaj palityčnaj situacyi jon niemahčymy ŭ Minsku. Kamisija pahladzieła karcinu — jana akazałasia dobraj, bačna, što ŭ jaje ŭkładziena šmat hrošaj, darečy, ničoha skandalnaha my ŭ joj nie znajšli. My źviarnulisia da dyrektara «Biełaruśfilma», i jon paprasiŭ niekalki dzion, kab paraicca ź Ministerstvam kultury, pry padtrymcy jakoha «Kupała» stvorany. Dumaju, kali ŭ nas atrymałasia damovicca z kinastudyjaj i ministerstvam kultury, to i sami biełarusy mohuć znajści sposab pakazać karcinu ŭ Biełarusi, navat u dadzienych abstavinach».
Uładzimir Karačeŭski miarkuje, što ŭ Biełarusi «Kupała» budzie pakazany da leta, što, u tym liku, budzie zaležać ad epidemijałahičnaj situacyi.
Ciapier čytajuć
U jakim miesiacy biełarusy pamirajuć čaściej za ŭsio?1
Kamientary