Žurnalistku Juliju Kockuju dastali z hatela i asudzili na 8 sutak za nibyta ŭdzieł u akcyi

Maskoŭski sud Miensku prysudziŭ karespandentcy BiełaPAN Julii Kockaj 8 sutak aryštu za nibyta ŭdzieł u niadzielnaj akcyi pratestu 15 listapada, jakuju jana aśviatlała, piša Svaboda.

Praces viała sudździa Lidzija Cielica.

15 listapada Julija Kockaja razam z kalehami Andrejem Šaŭluham i Andrejem Rabčykam rychtavałasia aśviatlać pratestavy marš u rajonie stancyi metro «Puškinskaja», znachodziačysia ŭ hateli «Arbita» na praspekcie Puškina. Z 11.30 da 12.00 nijakich padziej u tym rajonie nie było, aproč zatrymańniaŭ supracoŭnikami ŭ čornym asobnych prachožych, raskazała ŭ sudzie Kockaja.

Advakat Maksim Konan pradstaviŭ sudździ kopiju damovy z hatelem «Arbita», redakcyjnyja zadańnie i paśviedčańnie ad ahienctva BiełaPAN, fatazdymki, apublikavanyja ahienctvam BiełaPAN, zroblenyja Andrejem Šaŭluham da zatrymańnia.

Pavodle pratakołu, Kockaja nibyta pryniała ŭdzieł u pikietavańni «ŭ hrupie hramadzian» pa praspekcie Puškina, 39 u 12.30 «z metaj vykazvańnia niazhody ź dziejnaj uładaj». Julija Kockaja viny nie pryznała.

Žurnalistka raskazała, što jaje zatrymali ŭ numary hatela «Arbita», dzie jana pražyvała z 14 listapada. Z hetaha numaru jana razam z kalehami viała fota- i videafiksacyju taho, što adbyvałasia na vulicy, vykonvajučy svaje abaviazki žurnalista.

Žurnalistka padkreśliła, što na momant zatrymańnia nijakich masavych mierapryjemstvaŭ na praspekcie Puškina jašče nie było — tolki paasobnyja zatrymańni.

Pavodle Kockaj, u 12.30 u numar zajšli try čałavieki ŭ spartovych kaściumach i maskach, nazvalisia milicyjaj. Jany zahadali skłaści ŭsiu techniku na łožak, abšukali. Paśla jany vyvieli zatrymanych praz čorny chod hatela i pieradali ich supracoŭnikam AMAPu. Tyja dastavili Kockuju, Šaŭluhu i Rabčyka ŭ RUUS Maskoŭskaha rajonu.

Tam Kockaja ŭkazała, što niazhodnaja sa składzienym na jaje pratakołam pa administracyjnym artykule 23.34 (parušeńnie paradku praviadzieńnia i arhanizacyi masavych mierapryjemstvaŭ). Jaje adpuścili ŭ noč z 15 na 16 listapada.

Śviedka sa źmienienym proźviščam Ivanoŭ Ivan Ivanavič, supracoŭnik milicyi, raskazaŭ u sudzie, što nios słužbu ŭ rajonie praspektu Puškina 15 listapada, dzie ŭ rajonie 11.00 nibyta adbyvałasia pikietavańnie ź niezarehistravanaj symbolikaj.

Jon skazaŭ, što źmiena proźvišča źviazanaja ź «biaśpiekaj».

Pavodle milicyjanta, jon zapomniŭ Kockuju dziakujučy svajoj «fatapamiaci», ale pry hetym nia zmoh acanić kolkaść udzielnikaŭ «niesankcyjanavanaha pikietavańnia» ŭ rajonie zatrymańnia i nia pamiataŭ, čym kankretna zajmałasia Kockaja ŭ toj čas. Jon zajaviŭ, što nia ŭdzielničaŭ u zatrymańni, ale byŭ jaho śviedkam. Pry hetym jon nia pamiataŭ absalutna nijakich detalaŭ zatrymańnia. «Kožny dzień adbyvajucca zatrymańni», — paŭtaraŭ jon.

Milicyjant taksama nia zmoh nazvać, chto z kalehaŭ apytvaŭ jaho jak śviedku ŭ Maskoŭskim RUUS.

• 0
• 0
• 0
• 0
• 0
• 0
• 0
• 0