Žychar Viciebska atrymaŭ čatyry z pałovaj hady kałonii za padsiečku milicyjantu
9 śniežnia sud Pieršamajskaha rajona Viciebska zaviaršyŭ razhlad kryminalnaj spravy ŭ dačynieńni da 39-hadovaha viciablanina Aleha Jafremienki.
Sud pryznaŭ jaho vinavatym u złačynstvie pavodle artykułu 364 KK («Hvałt abo pahroza ŭžyvańnia hvałtu ŭ dačynieńni da supracoŭnika ŭnutranych spraŭ»), paviedamlaje «Viciebskaja Viasna».
Sudździa Natalla Karablina asudziła Aleha Jafremienku na pazbaŭleńnie voli terminam na čatyry z pałovaj hady z adbyvańniem pakarańnia ŭ papraŭčaj kałonii ahulnaha režymu. Čas znachodžańnia pad vartaj ad 16 vieraśnia zaličany ŭ čas adbyvańnia pakarańnia.
Taksama sud zadavoliŭ pazoŭ paciarpiełaha supracoŭnika MUS, jaki patrabavaŭ hrašovaj kampiensacyi maralnaj škody ŭ pamiery 1000 rubloŭ.
Heta treci pa liku praces pa kryminalnych spravach pavodle artykułaŭ 364 KK i 366 KK ( užyvańnie hvałtu da supracoŭnikaŭ MUS i słužbovych asob) u dačynieńni da ŭdzielnikaŭ vuličnych šeściaŭ u Viciebsku. Prysud, vyniesieny Jafremienku sudździoj Karablinoj, na siońnia samy žorstki.
U apošnim słovie abvinavačany jašče raz vybačaŭsia pierad paciarpiełym, jaki paśla padsiečki, zroblenaj Jafremienkam padčas sutyknieńnia pratestoŭcaŭ ź siłavikami 13 vieraśnia, upaŭ i padrapaŭ dałoni. Paprasiŭ Jafremienka prabačeńnia i ŭ svajoj žonki, jakaja zastałasia adna z małym synam.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary