Minsk — Maskva: hrymučaja sumieś ekanomiki i palityki

Pierapałka miž Kudrynym i Łukašenkam skončana, kanflikt vyčarpany. Takuju miralubnuju zajavu zrabiła ŭ aŭtorak ananimnaja kramloŭskaja krynica. Analityki ž zaznačajuć, što spružyny kanfliktu pamiž Minskam i Maskvoj pa-raniejšamu ścisnuty.

Pakazalna, što ŭ toj samy dzień, 2 červienia, dadatkovy załp pa kudrynskich pazicyjach (a heta i jość pazicyi Maskvy) zrabiŭ na pasiadžeńni prezidyumu ŭradu premjer Biełarusi Siarhiej Sidorski. Jon sarkastyčna paraŭnaŭ chod dumak rasijskaha ministra finansaŭ z myśleńniem kładaŭščyka, «u jakoha jość klučy ad śvirnavaha zamka i jaki dalej kładoŭki ničoha nie bačyć».

Kudryn u minuły čaćvier, nahadajem, abvieściŭ, što Rasija prytrymaje kredytnuju tranšu na 500 miljonaŭ dołaraŭ, bo Biełaruś, maŭlaŭ, prajadaje hrošy, a nie refarmuje haspadarku. Biełaruskija dziaržaŭnyja ŚMI źviazali demarš Maskvy z pytańniem ab pryznańni Minskam Paŭdniovaj Asiecii dy Abchazii.

Takaja ž vysnova naprošvajecca i z emacyjnych zajaŭ samoha kiraŭnika Biełarusi 29 traŭnia — nazaŭtra paśla skandalnaha pryjezdu maskoŭskich haściej na sajuzny Saŭmin. Plus, miarkujučy pa ŭsim, Rasija presinhuje ŭ pytańniach nabyćcia biełaruskich aktyvaŭ («Nas chočuć uziać holeńkimi i hołymi rukami, biaspłatna», — abmalavaŭ zakulisny siužet Łukašenka). Niekatoryja analityki dadajuć: Kreml razdražniony ŭdziełam Biełarusi ŭ novaj prahramie ES «Uschodniaje partniorstva».

Surovyja finansava-ekanamičnyja realii zmušajuć biełaruski ŭrad pakrysie sastupać patrabavańniam kredytoraŭ. Kudryn nahadaŭ ich: žyć pa srodkach, strymlivać zarobki, pavyšać kamunalnyja taryfy, refarmavać haspadarku. Darečy, faktyčna taho ž patrabuje i MVF.

Inšaja reč, što dačynieńni miž farmalnymi sajuźnikami — Minskam i Maskvoj ŭjaŭlajuć saboj hrymučuju sumieś ekanomiki dy palityki. Z zajavy Kudryna 1 červienia i kamientara kramloŭskaha ananima vynikaje, što ad padtrymki biełaruskaj ekanomiki rasijcy nie admaŭlajucca. Moža, i jašče pazyčać hrošaj. Tolki voś na jakich umovach?

Dniami biełaruski deputat Michaił Rusy, budučy na vybarach u Cchinvali, zajaviŭ, što nieŭzabavie pytańnie ab pryznańni Paŭdniovaj Asiecii razhledziać u Pałacie pradstaŭnikoŭ. Ale takija abiacańni ź biełaruskaha boku hučać daŭno. Ci sapraŭdy ciapier Maskva dacisnuła?

Minski palitołah Valer Karbalevič zaznačaje: pakul nie atrymana čarhovaja tranša ad MVF, pryznańnia dakładna nie budzie. «Uvohule ž adkazu na heta pytańnie siońnia, badaj, nie viedaje i sam Łukašenka», — dadaje ekśpiert.

Što ž da «Uschodniaha partniorstva», to, na dumku Karbaleviča, prahrama pakul što vyhladaje nadta dekłaratyŭna. I naŭrad ci jana nastolki niepakoić vysokaje rasijskaje načalstva, kab, naprykład, Pucin na pieramovach rubam staviŭ heta pytańnie pierad Łukašenkam. Z nahody mahčymaha sychodu Biełarusi pad kryło Brusiela pakul što najbolej pierajmajucca blizkija da Kramla palitołahi, dadaje surazmoŭca.

Ekśpiert Biełaruskaha instytuta stratehičnych daśledavańniaŭ (Vilnius) Dzianis Mieljancoŭ upeŭnieny, što, niahledziačy na prymirenčy ton Kramla, u pytańni pryznańnia kaŭkazskich respublik

«Maskva budzie cisnuć i nadalej. Pa-pieršaje, dla jaje važnaja mižnarodnaja lehitymacyja hetych respublik. Pa-druhoje, heta srodak upłyvu na “Uschodniaje partniorstva”».

Ekśpiert tłumačyć: Tbilisi moža admovicca ad supracy ŭ ramkach prahramy ES z krainaj, što pryznała niezaležnaść terytoryj, jakija Hruzija ličyć svaimi nieadjemnymi častkami. Takim čynam prahrama moža być tarpiedavana.

«Minsk budzie maksimalna ciahnuć hetaje pytańnie i pastarajecca nie pryznavać Abchaziju z Paŭdniovaj Asiecijaj», — pierakanany Mieljancoŭ.

Dadamo:

niepryznańnie Jeŭrasajuzam i ZŠA zładžanych u Paŭdniovaj Asiecii parłamienckich vybaraŭ taksama stymuluje biełaruskuju ŭładu ŭpiracca roham u zhadanym pytańni. Inačaj narmalizacyja dačynieńniaŭ z Zachadam moža pajści pad adchon.

Dzianis Mieljancoŭ padkreślivaje: «Uschodniaje partniorstva» — prahrama doŭhaterminovaja, nie varta čakać, što zaŭtra ŭ Biełaruś pojduć šyrokija hrašovyja płyni». Jak padkreślivaje ekśpiert, efiektyŭnaść prahramy budzie zaležać i ad Brusiela, i ad Minska, i ad hramadzianskaj supolnaści Biełarusi. Zaraz u jeŭrastrukturach tolki pryznačajucca čynoŭniki, adkaznyja za prahramu. Pad vosień, paśla siezonu adpačynkaŭ, varta čakać bolšaj kankretyki, ličyć Mieljancoŭ.

Tak ci inačaj, Minsk, na dumku naziralnikaŭ, hatovy chiba da łakalnaha drejfu, ale nie da sychodu na Zachad, pad kryło ES.

Ciapierašniaje biełaruskaje kiraŭnictva moža vybrać kropkavy, redukavany varyjant udziełu ŭ prahramie, kab atrymlivać niejkija hrošy, ale nie achviaravać aŭtarytarnaj palityčnaj sistemaj. Adnak trochi daviadziecca i sastupać, kab mieć absiah dla palityki arelaŭ. Bo paralelna buduć doŭžycca sproby atrymać hrošy i ad Maskvy, handlujučy svaim hieastratehičnym stanoviščam i śpiekulujučy na vialikadziaržaŭnaj fobii straty «biełaruskaha płacdarmu».

A heta aznačaje, što kanflikt miž zaklatymi sajuźnikami budzie tleć i čas ad času vybuchać novymi pratubierancami.

• 0
• 0
• 0
• 0
• 0
• 0
• 0
• 0